Shillong, Rymphang, 28: Ki khynnah skul kiba la pynkhreh bha ïalade kin sa leit ban thoh ïa ka eksamin Secondary School Leaving Certificate (SSLC) bad ka Higher Secondary School Leaving Certificate (HSSLC) ba la pynlong da ka Meghalaya Board of School Education (MBoSE).
Katkum ka jingai jingkheiñ jong u Joint Director ka Meghalaya Board of School Education (MBoSE) u Bah M. Marbaniang, ki khynnah kiba dang pule ïa ka Class-X kiba hap ban ïakhun ïa ka eksamin SSLC mynta u snem 2023 ki don 52,700 ngut, ha kaba 22,495 ngut ki dei ki shynrang bad 30,205 ngut ki dei ki kynthei.
Kiba ïakhun Regular-I ki don 22,334 ngut ha kaba 9361 ngut ki dei ki shynrang bad 12,973 ngut ki dei ki kynthei katba kiba ïakhun Regular-II ki don 12, 943 ngut ha kaba 5232 ngut ki shynrang bad 7711 ngut ki kynthei. Kiba ïakhun Private ki don 2032 ngut bad na kine ki long 1038 ngut ki shynrang bad 944 ngut ki kynthei. Ki Non-Regular ki don 10,147 ngut ha kaba 4676 ngut ki dei ki shynrang bad 5471 ngut ki dei ki kynthei. Kiba ïakhun Improvement ki don 12 ngut, kata, 8 ngut ki dei ki shynrang bda 4 ngut ki dei ki kynthei. Kiba ïakhun Compartmental ki don 5232 ngut, kata, 2180 ngut ki dei ki shynrang bad 3052 ngut ki dei ki kynthei.
Ki Centre thoh eksamin SSLC ha Shillong Region ki don 89 tylli bad 68 tylli ha Tura Region.
Ha ka eksamin HSSLC ki don 25,900 ngut kiba dei na ka Arts Stream, 3684 ngut na ka Science Stream, 2405 ngut na ka Commerce Stream bad 17 ngut na ka Vocational Stream. Haba kheiñ lang ïa ki khynnah pule Class-XII kiba ïakhun ïa kane ka eksamin ki don baroh 32006 ngut. Ha ka Arts Stream, ki khynnah shynrang ki don 10,456 ngut, ki kynthei 15,444 ngut. Ha ka Science Stream, ki shynrang ki don 1501 ngut baad ki shynrang ki don 2183 ngut. Ha ka Commerce Stream, ki shynrang ki don 1302 ngut bad 1103 ngut ki dei ki kynthei. Ha ka Vocational Stream, ki shynrang ki don 8 ngut bad 9 ngut ki kynthei.
Katba ki Centre thoh eksamin HSSLC ki don 66 tylli ha Shillong Region bad 40 tylli ha Tura region.
U Joint Director u la ïathuh ruh na ka daw ka jingïatakhuh bad ka elekshon jong ka Iingdorbar Thawaiñ jong ka jylla kaba la long ha ka 27 tarik u Rymphang, 2023, ïa ka eksamin SSLC la hap pynkynriah noh sha ka 3 tarik, Lber, 2023 kaba ïahap lang ha kajuh ka sngi bad ka eksamin HSSLC.
U la ïathuh ruh ba ha ka eksamin SSLC ha une u snem 2023 ki khynnah kiba ïakhun ki duna haduh 5925 ngut na kaba long ha u snem 2022 na ka daw ka jingshah pynthud ha ka khlam jingpang Covid-19 kaba la pyndkoh haduh katta katta ïa ka pule ka puthi jong ki khynnah skul ha baroh kawei ka jylla.
Katba ha ka eksamin HSSLC ka la kiew da 3832 ngut haba ïanujor bad ka jingkheiñ na u snem 2022 kaba long tang 28,174 ngut.
