Shisngi hadien ka jingthep vote ïakynduh u Conrad bad u Himanta ban ïakren thaw sorkar
Shillong, Rympahng 28: Shisngi hadien ka jingthep vote ban jied ïa ki MLA kiba thymmai sha ka Ïing Dorbar Thaw Aiñ ka jylla ka la kut bad ba ki Exit Poll ki la ïathuh lupa ïa ka jingjop jong ki party ha ka jylla ba yn ym don kawei ruh ka party ban jop haudh ban da ïoh thaw sorkar marwei, u President ka NPP u ba dei ruh u Myntri Rangbah ka jylla u Conrad K Sangma u la hiar bran bran sha Guwahati ban ïakynduh sopsop bad u Convenor ka North East Democratic Alliance (NEDA) uba dei ruh u Myntri Rangbah ka jylla Assam Himanta Biswa Sarma ban ïakren lupa ma bynta ka jingiathaw sorkar ha ka jylla hapdeng ka NPP bad BJP, ong ki tyllong khubor.
Kat kum ki tyllong khubor la ong ba kane ka jingïakren jong u Himanta u nongïalam ka BJP bad u Conrad u nongïalam ka NPP ka neh kumba shiteng kynta eiei.
Lah ban kdew hangne ba katkum ki exit polls la kdew ba kawei ruh ka party kan ym lah ban jop palat ïa ka 31 seat ban lah ban thaw sorkar marwei hynrei la kdew ba ka NPP kan dei ka party kaban jop bun ngut eh ki MLA katba ka BJP la ïathuh ba kan leh kham bha ban ïa u 2018 bad ba kan lah ban jop hhapdeng ka 6 haduh 10 seat.
Shuh shuh kat kum ki tyllong khubor la ïathuh ba na ka liang u Convenor ka NEDA u Himanta Biswa Sarma u la kren shai ba baroh ki party kiba don hapoh ka shatri ka NEDA bad National Democratic Allïance (NDA) kin ym leit ïasnoh satia bad kiwei pat ki party ban thaw sorkar kata bad ka Congress ne ka Trinamool Congress hynrei ba dei beit ba long katba long jia katba jia ka sorkar ha Meghalaya dei ban dei beit hapdeng ki party ba don bad ka NEDA ne NDA ka kynhun ba la ïalam da ka BJP.
Ka tyllong khubor ka kdew ruh ba ka BJP kam pat treh ban kren shai mano ban long u Myntri Rangbah ha Meghalaya hynrei ka pynap shuwa ban shimrai ban peit haduh katno seat ka BJP kan jop ha ka jylla ba kin sa shim ïa ka rai halor kane. Lah ban kdew ba kumba long mynta dei tang ka NPP bad ka BJP napdeng ki party kiba don ha ka jylla kiba dei ki kynhun kiba don ha ka NEDA hadien ba ka UDP ka la weng noh ïalade na kane ka kynhun ha u 2019.