Hukum ka ïingbishar HC ban pynbeit noh ïa ka jingpynkynriah ïa ki Harijan hadien ka Election

By Mawphor News Desk On Mar 1, 2023

Shillong, Rymphang 28 : Ka ïing bishar High Court jongka jylla ka la hukum ïa ka sorkar jylla ban pynbeit noh ïa ka kynrum kynram ha kaba ïadei bad ka jingthmu pynkynriah noh ïaki jaidbynriew Harijan na Them ïew Mawlong hadien ka Election ha ka jylla.
“Ka sorkar kadei ban shim khia mardor hadien ka election ban pynbeit ïaki kynrum kynram namar, ka sorkar ka la dep ithuh ïa ka jaka naka bynta ban pynkynriah ïa ki ba sah ha Them ïew Mawlong” la ong ka hukum bala pynmih da u Chief Justice Sanjib Banerjee haka 16 tarik Rymphang.
Ka ïing bishar ka la pynpaw ba ïa kane ka kam la pynsangeh ban shong bishar la katto katne por halor ka jingkyrpad jong baroh arliang mamla ban ïa pynbeit noh da ka jingïasngewthuh jingmut lang ïa kane ka kam. Ka ïing bishar kan shong bishar biang halor kane ka kam ha ka 17 tarik Lber.
Lah ban pynkynmaw ba ha 21 tarik u Risaw 2022, ka ïing bishar High Court kala pynmih ïa ka hukum bad la bthah ïa ka Harijan Panchayat Committee (HPC) ban jubab ïa ka jingtyrwa ka sorkar jylla ban ai jaka na ka bynta ban pynkynriah ïa ki 342 ngut ki long ïing na Them ïew Mawlong lada ki shah pynkynriah bad la aipor ruh ïa ka HPC ban jubab hapoh saw taiew.
Ha ka 29 tarik Nailur 2022 ka sorkar ka la ai ïa ka blueprint sha ka HPC ha ka jingïakynduh ha Secretariat bad ha katei ka blueprint la pyni kumno ka sorkar ka pynkhreh ban tei ïa ki ïing na ka bynta kitei ki 342 ngut ki long ïing ha ka jaka ba don ka ophis jongka Shillong Municipal Board.
ïa kane ka blueprint la ai hadien ba ka sorkar ka la kyntait mardor ïa ka jingtyrwa jong ka HPC ban ai jaka mar 200 square meter ïa kine ki 342 tylli ki long ïing bad kata ka jaka ka dei ruh ban long hapoh ka European Ward. Ha katei ka jingïalang ka sorkar ka la kyntait mardor ïa ki 8 tylli ki mat jingdawa ba la ai da u secretary ka HPC u Gurjit Singh kaba kynthup ruh ba ka sorkar ka dei ban pyntei ma ka ïa kitei ki ïing.
Hadien ba ka sorkar ka la ai ïa ka blueprint u Gurjit Singh u la ong “ Ka sorkar ka la ai ïa kane ka blueprint bad kumta ngin bishar bniah shwa ïa ka bad hadien kata ngin rah hakhmat ki 342 ki long ïing shwa ban ai jubab sha ka sorkar”.
Kaba lyngngoh ka long ba haduh mynta ka HPC kam pat ai jubab bad dei na kane ka daw ba ka ïing bishar ka sa shim khia ban bud dien ïa kane ka mukotduma.