Shillong, Lber 01 : Ka Nongdawah CC bad ka Hurdles CC ki la bteng khur jingjop ha ha lympyng ïalehkai kriket 2nd District League T20 Cricket Tournament 2023 ba pynïaid da ka East Khasi Hills Cricket Association (EKHCA) ha ki jingïalehkai ha ka sngi Balang.
Ka Nongdawah CC ka la khur jingjop da kaba pynliem da 6 wicket pyrshah ïa ka Marbisu CC katba ka Hurdles CC ka la pynliem da 50 ron pyrshah ïa ka Pomshutia CC.
Haba phai sha ka jingïalehkai kaba nyngkong hapdeng ka Marbisu CC bad Nongdawah CC, ka Marbisu CC kaba la jop ïa ka jingkynting pisa ka la kam trai ban tied nyngkong hynrei ka khlem lah ban kamai ron ha kaba ka la khyllem noh 10 wicket ha baroh ki 20 over bad kamai tang 90 ron.
U Mansuk M Kurbah u rangtied ba kamai bun ron na ka bynta ka Marbisu da 26 ron na ki 28 bol katba u Nangshai Nongpluh marwei u khur 4 wicket ai kamai tang 13 ron ha ki 4 over na ka bynta ka Nongdawah CC.
Haba wan beh ïa katei ka thong, ka Nongdawah CC ka la lah ban pyndep ïa ka thong tang ha ki 9.2 over da kaba kamai 91 ron duh noh 4 wicket ha kaba u Nangshai Nongpluh uba la ïoh ïa ka khusnam Player of the Match u ïoh ban kamai 35 ron na ki 22 bol katba u Andy Alwin Dkhar u ïoh 1 wicket ai kamai 13 ron ha ki 2.2 over.
Ha ka jingïalehkai kaba ar, ka Hurdles CC kaba la jop ïa ka jingkynting pisa ka la kam trai ban tied nyngkong bad da katei ka rai ka la ïoh ban kamai 170 ron duh noh 8 wicket ha baroh ki 20 over. U Pynshaitbor Girodh u kamai bun ron da 40 ron na ki 32 bol bad u Shembhalang Pyngrope u khur 3 wicket ai kamai 17 ron ha ki 3 over na ka bynta ka Pomshutia CC.
Ka Pomshutia haba wan beh ïa katei ka thong ba ka Hurdles CC ka la buh kam shym la lah ban pyndep bad tied pynkut tang ha ki 16.3 over da kaba kynjoh tang sha ki 120 ron duh noh 7 wicket. Dei tang u Shembhalang Pyngrope uba kamai bun ron da 59 ron na ki 53 bol, u Shrimonto Hajong u khur 3 wicket ai kamai 2 ron ha ki 2 over bad u Pynshaitbor Girodh u khur 3 wicket ai kamai 10 ron ha ka 1.3 over.
Kumta ka Hurdles CC ka la lah ban pynliem da ki 50 ron bad ïa ka nam Player of the Match la ïoh da u Pynshaitbor Girodh jong ka Hurdles CC uba kamai 40 ron.
