Shillong, Lber 01 : Ka kynhun ki rangïalehkai phutbol jong ka Meghalaya ki la bteng ban ïalehkai bha ha ka Santosh Trophy da kaba khur jingjop bad ïoh rung ruh sha ka phainal hadien ba ka la lah ban pynliem da 2-1 kol pyrshah ïa ka Punjab ha ka jingïakhun semifinal ha ka sngi Balang ha King Fahd International Stadium, Riyadh, Saudi Arabia.
Ha katei ka jingïalehkai semifinal kaba nyngkong jong katei ka lympung ka Meghalaya ka ïoh ruh ban thaw history ban rung sha ka phainal.
Haba phai sha ka jingïalehkai, baroh ar ki kynhun ki long kiba mar ïabiang bor bha naduh ka rukom pynshat bad pynlait bol, hynrei dei ka Punjab kaba la ïoh ban plie pyrda nyngkong ha ka minit ïalehkai ba 16 lyngba u Paramjit Singh. Watla ka la shah thep shi kol, pynban ka Meghalaya kam shym la duh mynsiem bad ïakhun tyngeh beit triang ban pynphai kol.
Ka Punjab ka la mih madan khlem ki rangïalehkai kiba hakhmat eh jong ka kynhun kum u Harpreet Singh uba dei u rangap kol, u Rohit Sheikh bad u Biplub Kala kiba dei ki nar thep kol.
Ka Punjab ka la ñion shakhmat naduh kaba sdang jong ka jingïalehkai hynrei ka bol ba la khyrwit da u Gurtej Singh kam shym la rung shapoh kol. la ïoh ban kyrda noh. Ka Meghalaya ruh ka la ïoh ka kabu hynrei ka bol ba la shut da u Ronalkyson Lyngdoh kam shym la rung.
Ka Punjab ka la ïoh ban thep ïa ka shi kol ha ka minit ba 16 hadien ba u Paramjit Singh u la khyrwit tyngeh najngai ïa ka bol kaba la rung shapoh ka jar. Pynban ka Meghalaya kaba khlem duh mynsiem ka la lah ban pynphai kylla ha ka minit ïalehkai ba 37 lyngba u Figo Syndai.
U Figo Syndai u la ïoh biang sa kawei ka kabu hadien ba u la ïoh rah ïa ka bol shapoh box hynrei ka bol ba u la shut ka la tam noh ïa u dieng kol. Ka Meghalaya kam lah ban pynurlong sa kawei ka kabu ha kaba ka jingïalehkai ha ka kylla step ka la kut da kaba thep mar 1-1 kol.
Haba wanphai sha ka jingïalehkai jong ka kylla miet, ka Meghalaya ka la bteng ban pynneh ïa ka rukom ïalehkai da kaba ñion sha ka kut jong ka Punjab. Ka Punjab ruh khlem da sangeh ka la bteng ban ïakhun tyngeh hynrei na ka liang ki nongïalehkai shakhmat kim lah ban pyndep ha ka liang ka thep kol.
Ha ka jingïalehkai kaba la jan poi sha ka extra time, u Donlad Diengdoh u la ïoh ban thep ïa ka kol kaba ar kaba la thaw history syndon ïa ka Meghalaya. U Donlad Diengdoh u la ïoh ban khyrwit na jngai ha kaba u rangap kol ka Punjab u Shamsheh Singh Mahala u khlem lah ban leh eiei watla u la pyrshang ban kem ïa ka bol kaba la rung suk shapoh ka jar.
Kumta haduh kaba kut ka Meghalaya ka la rung sha ka phainal jong katei ka lympung da kaba pynliem da 2-1 kol.
