Ki paidbah jong ka jylla Meghalaya lem bad kiwei pat ki jylla kum ka jylla Nagaland bad ka jylla Tripura ki ladep ban ai ïa ka rai jong ki ïa la ki jong ki Nongmihkhmat jong ki ha la ki jong ki jong ki Constitwennsi bapher bapher. Don ki Constituency ba ki paidbah ki la pynthymmai ïa la ki jong ki nongmihkhmat bad don ruh kiba dang shah jied biang ha ki paidbah ha ki Constituency jong ki.
Ka thymmei jingïathuh lypa (exixt poll) na Delhi, ka ong ba ka BJP kan ïoh thaw Sorkar biang ha Tripura, ka NDPP ruh kan ïoh thaw Sorkar biang ha Nagaland hynrei ha Meghalaya pat kan wan biang ka Sorkar synrop (Coalition Government) namarba ym don satia ki party ki ban jop bun paid ha kane ka kynti. Ka Exit Poll ka la ai jingkheiñ malu mala ba ka NPP kan ïoh haduh 18-24 seat, ka Congress 6-12 seat, ka BJP 4-8, ka UDP 8-12 seat, ka TMC 5-8 seat bad kiwei ki party pat mar iwei ne ar ki Constituency. Lada kane ka thymmei jingïathuh lypa ka dei shisha, ka Sorkar khleh khaw lang kan long hi kajuh, kata,ka MDA-II kumba ka la jia ïa ka Sorkar MUA I & II ba ïalam da u Dr. Mukul Sangma ha ki snem 2011-2013 bad 2013-2018.
Mano pat ban long Chief Minister, ym pat lah satia ban batai namar kan don hi ka jingïaknieh ïa kane ka shuki ksiar jong ka Sorkar.
Lada katei ka jingïathuh lypa ka dei, ki paidbah ki shu ïa vote kat ïa ki party ba ïoh Sorkar. Ym donkam ban ïakren bamsap bampong, ym donkam jingïakhih ïa ki mat bapher bapher namar sisien ba la jop, ïa uta hi ujuh ne ka juh ka/u nongmihkhmat kin ïai jied shi ïai jied hi ki paidbah.
Ha Meghalaya, kumba la paw ha ki san snem ba la leit noh ki paidbah ki la pdiang sngewbha ban synshar ka thok ka shukor, ka sarong ka kyreit, ka kren kop ka kren sop, bad ki paidbah kim salia shuh katba jia ba long bad ki kheiñ syiem bad mane ia ki Lei san snem ïa kat kiba jop ne long nongsynshar.
Ka kynhun ki riewpaidbah Ka Sur u Paidbah Hynñiewtrep ka la pynpaw ba ka angnud ba ha kane ka kynti u Chief Minister u dei ban long na ka jaidbynriew Khasi namar baroh shikatta ki snem ïa ka kam Chief Minister la bat da ki jaidbynriew Garo. Ym tang katta kane ka kynhun ka la kyntu ruh ïa ki seng riewlum ban ïatreilang hapoh kawei ka shatri khnang ban ïalam hi ïa ka Sorkar jong ki seng riewlum.
Haba sngap ïa ka jingpyntieng kohtympan jong ka BJP kaba ong yn ym don kano kano ka seng saiñpyrthei kaba lah ban thaw Sorkar khlem ka jingkyrshan jong ka BJP ka long kaba sngew thamula haduh katta katta bad ka jingkam jong ki nongïalam ka BJP ba ki Sorkar khlem ka jingkyrshan jong ka BJP kim lah ban ïoh ïa ki song pynroi, kane ka dei tang ka jingkren pyntieng khamtam ïa ki Jylla kiba rit ha kane ka thaiñ Shatei Lammihngi namarba ka Riti Synshar jong ka ri India ka sam lang ïa ka hok bad ka bhah jong ki nongshong shnong hapoh ka ri India baroh kawei. Ha ka por ba u Dr. Mukul Sangma u dang long u Myntri Rangbah ha Meghalaya ha ka por ba ka BJP ka dang ïoh bat ïa u lakam synshar hapoh ka jingïalam jong u Narendra Modi, ki song pynroi sha Meghalaya ki la wan beit kumba ka dei ban long bad ki projek kiba heh ki la urlong ha kane ka jylla.
Kane ka elekshon ha kane ka kynti ka kham pher bha haba ïanujor bad ki snem kiba la leit noh namarba ki paidbah lehse ki la kham sian bad kham stad na ka jingtrei borbah jong ka Social Media hynrei wat katta ym pat lah satia ban pynshisha ïa kata hynrei ngin dang hap ban ap ïa ka result ka ban sa pynbna ha ka 2 tarik Lber ban tip shai haduh katno ka Social Media ka la ai jinghikai ïa ki paidbah ban ai jingsneng ïa ki MLA barim ki bym larkam bad ban sei bujli da kiwei pat kiba thymmai kiba kham proh jabieng bad kiba shlan ban kren ïa ki dawbah jong ka jaidbynriew.
U paidbah u la pyndep ïa la ka jong ka kamram ïano ban pynphong pansngiat ha une u snem 2023.
