Leit ai mynsiem ka KSU Mawshynrut ïa u samla ïakura MMA

0

Nongstoiñ, Lber 1: Ka KSU Mawshynrut Circle hapoh ka jingïalam jong u Samla Armstrong Sohshang President KSU Mawshynrut Circle, ha rynkat ka jingsynran lang jong u Samla Mevin Puweiñ President KSU Banglapluh Unit lem bad kiwei ki dkhot jong ka seng, ki la leit kitbok kit rwiang ïa u Samla John Ronald Sangriang ha ïing sah jong u kaba don ha Banglapluh, hashwa ba un leit ïa shim bynta sha ka WFC Fight Night 3, ka ban long ha ka 5 tarik Lber 2023 ha Polofield TDSA ground Tezpur, Assam pyrshah ïa u rang ïakhun katei ka jylla u Prakamya.
U Samla John Ronald Sangriang 22 snem ka karta, u dei u khun ba duk khun swet bym don kmie don kpa shuh u ba shong ba sah tang ryngkat bad la ki para. Kumta u dang donkam shibun ki jingïarap na ka bynta ka jingleit ïalehkai jong u, namar um shem pat ïoh kano kano ka jingïarap na ka sorkar haduh mynta.
Kum ban shu pynkynmaw u Samla John Ronald Sangriang u la sdang ban ïalehkai MMA naduh u snem 2019. U la ïalehkai ha shibun ki tournament kiba kynthup ha ki jylla Hyderabad, Agartala bad Assam haduh 17 sien bad rem noh tang 3 sien. U shait ïalehkai Kick Boxing, Mauythai bad Mix Martial Art.
Ha u bnai Naitung jong u snem ba la dep, u la leit ïa shim bynta sha ka Mass State Sports Talent Identification Program 2022 hapoh ka STAR Program Phase-1, ba la pynlong da ka Meghalaya State Olympic Association, ha ryngkat ka jingïatreilang jong ka Directorate of Sports and Youth Affair Meghalaya Shillong bad u la shah jied na ka bynta ban ïoh training shi snem ha ki kam ïalehkai.
Na ka liang jong ka KSU Mawshynrut Circle, ka phah ïa ki jingkyrkhu kyrdoh bad kitbok kit rwiang ïa u samla John Ronald Sangriang. Ka kyntu ruh ïa u ba un nang trei shitom ha ki sap kyrpang kiba u don, khnang ba un poi sha ka thong jong ka jingjop bad ban wanrah ïa ka nam bad ka burom nyngkong ïa ka ïing ka sem, ka dong ka thaiñ bad ïa ka jylla baroh kawei.

Leave A Reply

Your email address will not be published.