Shillong, Naiwieng 13: Ka Mawkynrew Sohphlang Eco-Cultural Indigenous Society kan pynlong biang ïa ka Tamasa Sohphlang ha ka 12 tarik u Nohprah 2026 ha Madan Rapleng, ha kjat u lum Rapleng, hapoh ka Mawkynrew Block. Ka tamasa ka thmu ban kyntiew ïa u sohphlang bad ïa ka rep ka riang, bad ban ai lad ïa ki nongrep ka thaiñ ban die ïa la ki mar rep.
U nongai buit jong ka seng, u Bah Carmel Lyngdoh, u la pyntip ïa kane ha ka jingïakynduh bad ki nongthoh khubor ha New Hope Restaurant ha ka 13 tarik u Naiwieng. Ha ka sngi jong ka tamasa, yn don ka jingtem jingput tynrai, ka jingrwai bad jingtem jong ki kynhun na ka thaiñ, kynthup ïa ka Thunder Cave, bad ki jingïalehkai bapher bapher.
U President ka seng, u Samla Pynbianglang Kshiar, u la ong ba ha ka tamasa yn pyninam ïa ki mar rep, ki tiar ba shna da ka kti bad ki jingbam tynrai jong ka thaiñ, kynthup ïa u Cake Krai. Yn don ruh ka jingïakop pyninam na bynta ki paidbah ka thaiñ bad ka ïew die lang, ha kaba ki nongrep kin wanrah ïa ki jhur ki jhep bad kiwei ki mar rep ban die sha ki paidbah.
Haba kren shaphang ka jingïakop pyni sap, ka Samla Pynsngewtynnad Rynjah ka la ong ba ki samla na kylleng ka Ri Khasi ki lah ban ïashim bynta. Ka bai ??ng kyrteng ka long ?300.
Katkum ka seng, ka dor u sohphlang ka la kiew naduh ba ka la sdang pynlong ïa ka tamasa, bad kane ka la ïarap ïa ki nongrep ban kham ïoh nong na ka jingdie ïa u. Ka seng ka la pan jingïarap na ki tnad Sorkar bapher bapher bad ka dang bteng ïa ki jingpynkhreh, watla ka Sorkar kam pat ai jingkular ban mang pisa.
