Rakhe ka ICAR ïa ka Janjatiya Gaurav Divas, ai burom ïa ki nongrep bad nongseng kam riewlum

Nongpoh, Naiwieng 13: Ka ICAR Research Complex for North Eastern Hill (NEH) Region, Umiam, ka la rakhe ïa ka Janjatiya Gaurav Divas da kaba kynmaw burom ïa u Bhagwan Birsa Munda, uwei na u nongïalam uba ïa khun laitluid na ka bynta ki paid riewlum. Kane ka jingrakhe ka long ruh kum ka dak ban burom ïa ka rukom im bad ki jingnoh synñiang jong ki jaitbynriew riewlum sha ka imlang sahlang bad ka kam rep kam riang bad ka jingdonkam ban ïada bad pynneh pynsah ïa ka kolshor, ki dustur bad ka jingstad tynrai jong ki jaitbynriew riewlum.
Ha kane ka prokram la wan ban shim bynta da u Bah Brightstarwell Marbaniang MLA ka Mawlai kum u kongsan, u Bah Mathew K Makdoh nominated MDC kum u symbud kongsan, u Dr. G. Kadirvel, Director, ICAR Research Complex for NEH Region, Umiam haka jingdonlang ki nongmihkhmat na ki kynhun sengbhalang bapher bapher, ki nongrep, bad ki nongtrei jong ka ICAR bad kiwei kiwei ki riew pawkhmat.
Haba kren ha kane ka sngi, u la kyntu ïa baroh ban kynmaw ïa ki jingaiti jong ki nongïakhun laitluid jong ka ri bad ai ruh ka jingïaroh ïa ka ICAR halor ki sienjam ba ka shim ban kyrshan ïa ki nongrep, bad u la kyntu ïa ki nongrep ban ïai don jingïadei bad ki jingstad saian, khnang ba kin lah ban pyntreikam ïa ki rukom rep kiba thymmai, ban pynkiew ïa ka jingmih bad ka ïoh ka kot jong ki.
U Bah Mathew K. Makdoh, MDC, ha ka jingkren jong u, u la pynpaw ïa ka jingriewspah jong ka jylla Meghalaya ha ka liang ka kolshor, ka riti ka dustur bad ka jingstad tynrai kaba la buh da ki longshuwa manshuwa. U la ban jur ba ka jingwad bñiah ha ka liang ka rep ka riang ka dei ban wanrah ïa ki jingkylla kiba don jingmut ha ka jingim jong ki nongrep, khamtam ban pynbha ïa ka ïoh ka kot jong ki.
Naka liang u Dr. G. Kadirvel, Director, ICAR Research Complex for NEH Region, Umiam, u la ban jur ïa ka jingdonkam ban ïada, pynneh bad pynsah ïa ka kolshor, ki dustur bad ka jingstad tynrai ha kane ka jylla bad u la ong ba ki nongrep hi ki don ïa ka sap bad ka bor ban thaw ïa ki buit thymmai kiba lah ban noh synñiang sha ka roi ka par jong ka kam rep kam riang.
U la kyntu ruh ïa ki nongrep ban shim kabu bad pyndonkam hok ïa ki skhim bapher bapher jong ka sorkar, kynthup ïa ka PM-KISAN, PMFBY bad PM-KUSUM, khnang ban pynkhlaiñ ïa ka kamai kajih bad ka jingim jong ki.
Ha kane ka sngi naka liang ka ICAR kala pynkup burom ïa ki nongrep bad ki nongseng kam seng jam na ki jaitbynriew riewlum kiba la noh synñiang shibun ha ka kam rep kam riang bad ka kam khaii pateng ba kynthup ïaka Kong Persara Dohling kaba la ïoh ïa ka khusnam Best Tribal Woman Farmer Award, ka Kong Reena Nongrum ka la ïoh ïa ka khusnam Best Tribal Entrepreneur Award, katba u Bah Precious John Madur u la ïoh ïa ka khusnam Best Tribal Farmer Award.
Shuh shuh, ha kane ka sngi la sam ruh ïa ki symbai jhur sha ki nongrep kum ka jingkyrshan ïa ki kam rep jong ki.