U-20 Men’s National Football C’ship 2026: Mynta ka sngi pyrshah ïa ka Kerala yn aireng ka M’laya ha ka QF

Shillong, Jymmang 22: Ka kynhun ïalehkai jong ka Meghalaya kan aireng pyrshah ïa ka Kerala ha ka Quarterfinal jong ka Swami Vivekananda U-20 Men’s National Football Championship 2026 ha Narainpur, Chhattisgarh, ha kane ka sngi Saitjaiñ, ka 23 tarik Jymmang.
Baroh ar tylli ki kynhun kin jam sha kane ka wat ïakhun knockout ryngkat bad ka rekod jingjop kaba paka ha la ki jong ki jingïalehkai group stage. Ka jingïakhun hapdeng kine ki arliang mamla kan sdang ha ka por 7 baje mynstep.
Ka Meghalaya ka la pyndep ha khlieh duh jong ka Group A da kaba khur pura 12 poiñ hadien ba ka la lah ban pynliem ïa ka Bihar da 3-1 ha ka jingïalehkai ba nyngkong ha ka 09 tarik u Jymmang bud sa ka jingjop da 5-0 kol pyrshah ïa ka Jharkhand, 8-1 pyrshah ïa ka Andhra Pradesh ha ka 13 tarik Jymmang bad 3-0 pyrshah ïa ka Rajasthan ha ka 17 tarik Jymmang.
Ka jingïakhun pyrshah ïa ka Kerela, kaba wan kyrdan ba nyngkong ha ka Group C, kan dei kaba jwat tam ïa ki khynnah ïalehkai jong ka Meghalaya ba la ïalam da u Jeffrey Warlarpih.
Ka Kerala ka la pynliem ïa ka Chandigarh da 5-1 ha ka 13 tarik Jymmang, ïa ka Uttarakhand da 3-0 (15 tarik Jymmang), ïa ka Andaman & Nicobar Islands da 12-0 (19 tarik Jymmang) bad ïa ka Jammu & Kashmir da 6-1 (21 tarik Jymmang).
Ka Meghalaya bad ka Kerala ki la ïakynduh pyrshah dang ha u snem ba ladep ha kane ka juh ka lympung. Ha kane ka por baroh ar ki la shah pynïakap ha kajuh ka group, ha kaba ka Meghalaya ka la jop da 2-1 kol. Hynrei namar ba ka dei ka lympung katkum ka rta hapoh 20 snem, ki don tang katto katne ki nongïalehkai kiba sah naduh u snem 2025 ha ka kynhun Meghalaya mynta u snem.