Jowai, Naiwieng 04: Ki ar tylli ki jingïalehkai phutbol ka lympung ‘Hajan Shylla Memorial Football League 2026’ jong ka kyrdan ‘First Division’ bad ka kyrdan ‘Super Division’ kaba la tip kum ka ‘Kesilroy Memorial Football League 2026’ ba la long hynne ka sngi Balang, 04 tarik u Naiwieng 2026, ki la kut ha ka jingïakhaid.
Baroh ar tylli ki lympung ba la kdew haneng la pynïaid daka Thadlaskeiñ Sport Association (TSA) bad ki jingïalehkai la pynlong ha Wahiajer Multi Sports Complex Stadium.
Haba phai sha ka jingïakhun ba nyngkong jong ka ‘1st Division’ ka Evergreen SC bad ka Namdong-B kila ïakhaid da mar 2-2 kol. Ka Evergreen SC ka la pynkhihjar ar sien lyngba u Rimon Kharmuti (33’) bad u Robert Syngkon (35’) ban lamkhmat ïa ka kylla step hynrei ka Namdong-B ka la wanphai da kaba tyngeh ban pynphai ar kol ha ka kylla miet lyngba u Phrangsngi Law (50’) bad u Kynsai Lamurong (54’).
Nangta ka jingïakhun ba ar jong ka Super Division, la sakhi ïa ka Wahiajer SC bad ka Nongkhroh Krem Kum kiba la ïakhaid da mar 1-1 kol. Ka Nongkhroh KK ka la lamkhmat ïa ka kylla step lyngba u Teilang Pyngrope (45+3’) uba la pynkhihjar ha ki minit pynjlan shuwa ban jam sha ka por shongthait hynrei ka Wahiajer SC ka la pynïakhaid na u Hame Dkhar (79’).
Ka prokram ïakhun ha kane ka sngi Palei (5.11.2026) ki long: Haka kyrdan ‘1st Division’ ka Lumsharatoh SC kan aireng pyrshah ïaka Maya SC haka por 11 baje mynstep; katba ha ka kyrdan ‘Super Division’ ka Ummulong SC pyrshah ïaka Mukhla Raij SC haka por 2 baje shiteng nohphai sngi.
