Pdiang burom ka SWKHDAWA ïa u Samla Jimmison Marweiñ ba khur takma Rupa ha ka 47th World Arm Wrestling C’ships 2026
Mawkyrwat, Naiwieng 04: Ka South West Khasi Hills District Arm Wrestling Association, Mawkyrwat, ryngkat ka ka South West Khasi Hills Sports Association, ka la pynlong ïa ka jingpdiang burom ïa u samla Jimmison Marweiñ ha ka jingwan phai jong u sha la shnong, hadien ba u la wanrah ïa ka nam bad ka burom ïa ka South West Khasi Hills District, ka Jylla Meghalaya bad ka ri India hi baroh kawei lyngba ka jingïashim bynta ha ka 47th World Arm Wrestling & 28th Para Arm Wrestling Championships 2026, naduh ka 28 Risaw haduh 6 tarik u Naiwieng, 2026 ha Nongbah New Delhi.
Ha kane ka jingïakop, kaba long ruh ka sien kaba nyngkong ïa u ban leit mihkhmat, u samla Jimmison Marweiñ u la lah ban khur ïa ka takma rupa (Silver Medal) ha ka kyrdan Youth Category. Kane ka jingjop ka long ka jingkmen bad ka jingsarong kaba khraw ïa ka dong ka thaiñ South West Khasi Hills District baroh kawei, khamtam eh ïa ka South West Khasi Hills Arm Wrestling Association, Mawkyrwat, namar ka pyni ïa ka sap bad ka jinglah jong ki samla jong ka distrik ban poi sha ki kyrdan ïalehkai kiba heh ha ka pyrthei.
Ka jingjop jong u samla Jimmison kam dei tang ka jingjop jong ka district, hynrei ka long ruh ka jingjop kaba wanrah nam bad burom ïa ka Jylla Meghalaya bad ïa ka ri India hi baroh kawei. Ka jinglah jong u ban khur ïa kane ka takma ha ka sien kaba nyngkong jong ka jingïashim bynta jong u, ka long ruh ka jingai mynsiem bad ka jingpynshlur ïa kiwei pat ki samla ïalehkai ban trei shitom bad ban pynjanai ïa la ki sap ha ki jingïalehkai bapher bapher, khamtam eh ha ka jingïalehkai Arm Wrestling.
Ha ka jingïalang, la ïoh ruh ban aiti ïa ka jingaisngewbha sha u samla Jimmison Marweiñ kum ka dak jong ka jingsngewnguh, sngewburom ïa ka jingjop jong u, kaba la aiti da u Bah H.S. Diengdoh, President jong ka ka South West Khasi Hills Sports Association.
Haba ai jingkren ha kane ka sngi, u Bah Eldestson Wanniang, President jong ka ka South West Khasi Hills District Arm Wrestling Association, u la ai ïa ki kyntien kyrkhu kyrdoh ïa u samla Jimmison Marweiñ ha ka jingïaid lynti jong u, da kaba pynpaw ïa ka jingkmen bad ka jingsarong halor kane ka jingjop kaba u la wanrah. U la kyntu ïa u samla Jimmison ba un ym hun tang ha kane ka jingjop, hynrei ban nangïai trei shitom, ban pynkhlaiñ shuh shuh ïa ka jingpynkhreh (practice) bad ban bteng ban ai mynsiem bad pyni ïa ka nuksa kaba bha ïa kiwei pat ki para samla.
U la pynpaw ruh ba kum ka Association, ki don ka jingkyrmen kaba khraw ba u samla Jimmison un nangïai kiew shaphrang ha ka jingïalehkai Arm Wrestling bad ban nangwanrah shuh shuh ïa ki takma bad ka nam jingjop na ka bynta ka South West Khasi Hills District, ka Jylla Meghalaya bad khamtam eh ïa ka ri India ha ki jingïakop ha ki kyrdan bapher bapher ha ki sngi ban sa wan.