Riyadh:U Cristiano Ronaldo u khlur ïalehkai phutbol ba pawnam ka pyrthei bad uba la juh khur bun tylli ki khusnam ha manla ki jaka ba u mih madan sa shisien pat ha miet jong ka Sngi Palei u la lah ban rah sa kawei ka khusnam ha Saudi Pro League ha kaba u la thep ar tylli ki kol ban pyntikna ba ka klob ba u mih madan ka Al Nassr kan rah ïa ka nam lahduh hadien hynñiew snem.
Ka Al Nassr ka la pynliem ia ka Damac da 4-1 ha ka jingialehkai ba khatduh jong ka samoi mynta u snem 2025-26, ïa ka kol ba nyngkong eh la thep da u Sadio Mane ha ka minit ba 33, la pynbud sa u Kingsley Coman ha ka minit ba 51 bad dei ha ka minit 57 ba ka Damac ka la ïoh pynphai shi kol lyngba ka penalti ba la shut da u M.Sylla bad la pynbud sa ki artylli ki kol jong u Ronaldo ha ka minit ba 62 bad 80, ba dei lyngba kine artyli ki kol u Ronaldo kiba pyntikna ia ka Al Nassr ba kan rah syndon ia ka khusnam lahduh.
Ka jingïakhun hapdeng ka Al Nassr bad Damac ka la long kaba shongshit bad kaba pynsyier mynsiem ïa ki nongkyrshan jong ka Al Nassr bad kumjuh ïa ki nongkyrshan ba radbah jong u Ronaldo baroh shi tyllup ka pyrthei, ka Al Nassr ka donkam ban jop ha kane ka jingialehkai ba khatduh namar ka Al Nassr ka tam tang ar poiñ ia ka Al Hilal, haba peit ha ka miej kheiñ poiñ ka Al Nassr ka la ïoh ban khur 86 poiñ katba ka Al Hilal pat ka la ïoh 84 poiñ.
U Ronaldo u la long uwei napdeng ki nongthep kol uba la kham heh kyrta, ha kaba u la kynjoh sha ka 41 snem mynta u snem, ka jinglong dukhi u Ronaldo kadei ba u don ka mynsien ban trei shitom bad ban ia khun pyrshah ia ki jingeh.
U Ronaldo u la kot ha u mawjam ba halor duh, ban long kum u nong thep kol ba kynsai. U la ïoh ban thep haduh 973 tylli ki kol ha ka jingmih madan jong u na ka ri bad ka ki klob.
Ka jingiaid lynti u Ronaldo ban ïoh khur ia ki saw tylli ki khusnam
U Ronaldo u la mih madan nyngkong eh na kawei ka klob ba pawnam jong ka ri Portugal kata ka Sporting CP ha u snem 2002-2003, ha kane ka klob u Ronaldo u ioh lad ban mih madam tang shi snem tam ei ei.
Na ka 31 sien ka jingmih madan u Ronaldo na Sporting u la lah ban thep 5 kol bad u la ioh khur tang kawei ka khusnam ha ka Portuguese Super Cup, ia kane ka khusnam la tip kyrteng kum ka Supertaça Cândido de Oliveira.
Hadien ba u Ronaldo u la mih noh na Sporting CP u la leit pyniasoh noh bad ka klob radbah ka pyrthei bad ka klob ba khlaiñ bor napoh England kata ka dei ka Manchester United ha u snem 2003, ba dei ha kane ka klob ba u Ronaldo ula pyni sha ka pyrthei ba u long u rangialehkai uba don shisha kata ka sap ba kyrpang. U Ronaldo u la mih madan na Manchester United kumba 346 sien haba khein lang bad ka jing wan pyniasoh ba arsien jong u ha u snem 2021.
U Ronaldo u la ioh ban thep kumba 145 tylli ki kol ha kane ka klob bad ki khusnam 3 tylli Premier League, 1 UEFA Champions League, 1 FA Cup, 2 League Cups, 1 FIFA Club World Cup, bad 2 FA Community Shields.
Ha Real Madrid u Ronaldo u la bteng ban pyni sha ka pyrthei kum uwei na ki rangialehkai ba kynsai tam bad barem dor tam bad u la leit pynïasoh bad ka Read Madrid ha u snem 2009. Ha kane ka klob thymmai jong u kumba 438 sien u Ronaldo u la ïoh mih madan bad u lah ïoh ruh ban pynkhih jar kumba 450 kol. U Ronaldo bad ka Real Madrid ki la ioh ban khur ia ka khusnam kumba 4 tylli UEFA Champions League, 2 La Liga , 2 Copa del Rey bad 2 Spanish Super Cups.
Ka jingiaid lynti jong u kam shem la kut tang ha Real Madrid ba dei ha u 2018 ba u Ronaldo u la mih noh na Madrid ban leit pynïasoh sa bad ka klob Juventus jong ka ri Italy. 134 sien u ioh mih madan bad kumba 81 kol u la pynkhih jar. U Ronaldo u la ïoh rah 5 tylli ki khusnam ha Italy ( 2 tylli Serie A, 1 Coppa Italia, 2 Supercoppa Italiana )
Ka mynsien ia khun u Ronaldo kam shem la kut tang ha ki klob Europe hynrei wat shaduh dewbah Asia, u la leit ban pynïasoh bad ka klob Al Nassr ha u snem 2022.
U Ronaldo u la ïoh ban rah kawei ka khusnam (Roshn Saudi League trophy) ha ka miet Sngi Palei.Ka jingïaid lynti u Ronaldo kam shem pat la kut bad kane ka klob na Saudi.