Shillong, Jymmang 22: Ka Nongkseh SSCC bad ka Shillong Lajong FC ki la pynthikna ïa ar tylli ki jaka ha ka Semifinal na ka Group A ha ka 5th Meghalaya State League da kaba jop ïa la ki jong ki jingïalehkai Quarterfinal league stage hynne ka sngi Thohdieng.
Ka Nongkseh ka la pynskhem ïa ka jaka da kaba pynliem noh ïa ka Rangdajied United da 4-1, katba ka Lajong ka la jop da ka said da tang 1-0 ïa ka Mawlai SC ha ka jingïalehkai kaba bud.
Ka jingjop jong ka Lajong lyngba ka kol jong u Fridison Wanniang ha ka minit kaba 72 ym tang ba ka la pynskhem ïa ka jaka ha ka semi hynrei ka la pynthikna ruh ba ka Mawlai, kaba bat ïa ka nam lahduh, ba kan nym lah shuh ban jam shakhmat.
Ha ka miej, ka Nongkseh ka lamkhmat ïa ka Group da 11 point, ka Lajong ka la khur 10 point ha ka kyrdan ba ar, nangta ka Mawlai ha ka kyrdan ba lai da 7 point. Ka RUFC ka la sah khlem kamai wat tang shi point. Watla ka dang sah sa kawei ka jingïalehkai hynrei ka jingshah rem ar sien lynter ha ka Lajong ka mut ba ka Mawlai kam don jingkyrmen shuh ban pyndep ha ka thup kyrdan Top 2 (da kaba pynshong nongrim ïa ka rekod jingjop hapdeng kine ki arliang) wat lada ka lah ban pynliem ïa ka Nongkseh ha ka sngi Nyngkong bad ka SLFC kan shah rem noh ha ka Rangdajied.
Shwa ïa kane, u Banpynkhrawnam Nongkhlaw (30’) u la ïoh ban pynkhih ïa ka kol ba nyngkong jong u ha kane ka lympung hynrei ka Nongkseh ka la hap ban ap haduh ka kylla miet ban pynskhem ïa ka jingjop da kaba thep sa lai tylli ki kol.
Hadien katto katne ki kabu kiba la shu sep-ei, ka Nongkseh ka la pynkhihjar biang lyngba u Khrawkupar Jana (56′, 63′) bad u Sheen Sohktung (59’) ban pynskhem ïa ka jingjop khlem jingartatien. Ka Rangdajied ka la ïoh ba kan pynphai shi kol lyngba u Pasborlang Khonglikong ha ka minit kaba 76.
Ka taïew kan kut da ka jingïakhun jong ka Group B, ha kaba ka Nangkiew Irat SC kan aireng pyrshah ïa ka Maram FC ha ka por 2 baje mynsngi; ka Nangkiew ka la jop ïa ka 1st leg da 7-1. Nangta ha ka por 6 baje janmiet, ka Langsning FC kan aireng pyrshah ïa ka Rymbai Shkenshynriah SC; ha ka 1st leg ka Langsning ka la jop da 3-0.
