Shillong, Jymmang 22: Ka State Level Inter-School Athletics Meet 2026 kaba lai sngi lynter ka la poi sha kaba kut hynne ka sngi Thohdieng (22 tarik Jymmang) ha SAI STC NEHU, Shillong, ha kaba ka kynhun jong ka East Khasi Hills District ki la ïohrah ïa ka nam lahduh.
ïa kane ka lympung la pynlong da ka Meghalaya Athletics Association ha ryngkat ka jingkyrshan jong ka Directorate of Sports and Youth Affairs, ka Sorkar Meghalaya.
Nalor ka burom lahduh ka East Khasi Hills ka la khur ruh ïa ka nam Kynhun ba kynsai tam lane Best Team ha baroh ar kyrdan jong ki shynrang bad kynthei, katba ka North Garo Hills ka la wan kyrdan ba ar ha ka liang ki khynnah shynrang, nangta ka West Jaintia Hills ka la pyndep kyrdan ba ar ha ka liang ki kynthei.
Ka la don ruh ka jingsam khusnam shimet sha ki nongïalehkai ba kynsai, ha kaba u Ewandame Mark Syiemlieh jong ka East Khasi Hills u la khur ïa ka nam Best Athlete ha ka kyrdan Under-14 jong ki shynrang na ka bynta ka high jump, katba ka Lamsaka Dkhar jong ka East Jaintia Hills ka la khur ïa kane ka khusnam ha ka kyrdan Under-14 jong ki kynthei (long jump).
U Highbornson Muksor jong ka East Jaintia Hills u la khur ïa ka nam Best Athlete ha ka Under-16 jong ki shynrang, katba ka Amandy Rumnong (East Khasi Hills) ka la khur ha ka liang ki kynthei.
ïa ka khusnam Best Athlete ha ka kyrdan ïalehkai Under-18, u Cherim Ch Sangma (North Garo Hills) u la khur ha ka liang ki shynrang’, katba ka Tusame N Marak (East Khasi Hills) ka la jop ha ka liang ki kynthei.
Ha kane ka sngi la wan kongsan da u Myntri ka tnad ïalehkai, Bah Wailadmiki Shylla, uba la ai khublei ïa ki nongpynïaid, ki nongïalehkai na ka bynta ka jingpynïaid kaba jop ïa kane ka lympung bad u la ïaroh ïa ki khynnah kiba ïashim bynta shitrhem da ka jingkut jingmut.
U la kyntu ïa ki nongïalehkai ba kin dang ïai trei shitom bad pynkhreh na ka bynta ka 39th National Games, kaba ka Meghalaya kan pdiang ha u snem ban wan, da kaba kyrmen ba bun ki samla ka jylla kin ïashim bynta bad kin wanrah burom ïa ka jylla Meghalaya.
ïa ka jingïalang la pynkut da ka jingshim bynta jong u Myntri ka tnad Sports, ha ryngkat ki ophisar ka tnad ïalehkai, ban sam ïa ki khusnam sha ki nongjop bad pynbna ruh ïa ka State Level Inter-School Athletics Meet 2026 ba la pynkut noh ha ka jingïadonlang u Working President ka MSOA bah John F. Kharshiing, Director ka tnad Sports & Youth Affairs D.D. Shira, Assistant Director ka Sports & Youth Affairs P.B. War Nongbri, District sports officers bad kiwei kiwei ki riew pawkhmat.
