Shillong, Iaiong 20 : Mynta ka sngi haka por 5.30 ei ei janmiet katba kawei ka kali kaba dei ka Bolero ba don u number ML 05 AD 5514 ka dang hiar nangne na Shillong sha ki thaiñ Pynursla ka la jia noh ka jingjia kaba sngewsih ha kaba la jia ka jingtwa jongka khyndew bad ki maw bad btep ïa kane ka kali. Kane ka jingjia ka la jia hajan ka shnong Mawlieh, hajan Pynursla bad ha kane ka jingjia arngut ki briew ki la iap.
Haba ïakren bad u SP ka East Khasi Hills u bah Vivek Syiem mynta ka miet u la ïathuh kat haduh mynta kim pat lah ban sei ïa kitei ki metiap bad ki dang don hapoh ka kali. Namar la ïathuh ba ka daw ka dei namar ba ki hap ki maw baheh baheh halor katei ka kali.
