Bthah ka sorkar ïa ki skul bad ki shnong khappud ban peitngor na ka jingkhie ka jingpang niangpyrsit

Shillong, Ïaïong 20: Ka sorkar jylla ka la pynmih ïa ka jingpynsngewthuh paidbah halor ki jingpynbeit kiba mardor halor ka jingkhie ka jingpang niangpyrsit kaba la khie ha ri Bangladesh bad kaba lah ruh ban don ka jingma ha ki thaiñ khappud jong ki district bad ki block, bad ka la ong ba donkam ban pynkhlaiñ ïa ki jingpeitngor, ka jinglap kloi, bad ki jingai kaiphod bad ki lad jingsumar ha baroh ki jaka jong ka East Khasi Hills District.
Baroh ki jingpang jingkhie jingshit ba don bad ki jingdait ba la suba ba dei ki niangpyrsit ha kano kano ka rta dei ban pyntip kloi mardor.
Ha ki jaka pule bad ki ICDS, la bthah ïa kine ban bud bad ban ai ki jingtip kiba kloi ïa kino kino ki jingjia kiba ïadei bad ki jingpang niangpyrsit ïa kino kino ki khynnah ne ki briew kiba don ka jingpang shitmet bad ba dei ban ithuh ha ki skul bad ki Anganwadi Centre bad halor kine dei ban pyntip mardor sha ki jaka sumar kiba don hajan ne sha ki ANM bad Medical Officer.
Dei ban don ka jingïatreilang kaba jan bad ka tnat ka koit ka khia ne bad ka WHO, ban pynthikna ïa ka jingïatreilang kaba hajan khnang ban lap bad tohkit bad ban lah ban ai ki jingsumar kiba kloi.
Ki sienjam kiba lah ban ïada ki long ba la bthah ba lada don kino kino ki khynnah kiba la suba ba ki ïoh ïa kane ka jingpang dei ban pyrkhing ba kin leit sha ki skul ne AWC tat haduh ba kin da ïoh ïa ka jingkoit jingkhiah kaba pura.
La ai jingmut ruh ba ïa ki khynnah dei ban pynshong marwei ha la ïing da kaba pynduna na ka jingïakynduh briew khnang ban ïada shuh shuh na ka jingpur bad saphriang kane ka jingpang.
La ai jingmut ba ïa ki nonghikai bad ki Anganwadi Worker dei ban pynsngewthuh ïa ki dak ki shin kiba ïadei bad ka jingpang shitmet ba don bad ki jingdait ka met bad kiwei ki dak ki shin. Dei ban don ruh ka jingpeitngor kaba manla ka sngi khnang ban pynneh ïa ka jinglap kaba kloi halor ka jingsuba jong kane ka jingpang.