Rai ka Sorkar ban pyndam noh ïa ka projek Lumpongdeng ha sngi ba 12 ka jingshah thngan

Shillong, Ïaiong 20 : Ka Sorkar Jylla ha ka sngi Nyngkong ka la pyndam noh ïa ka projek ha ka dewlynnong Lumpongdeng khyndiat kynta hadien ka jingïakynduh ïa ka Synjuk ki Rangbah Shnong na Ri Bhoi District ha Secretariat.
“Ha ka jingïalang ba la lum da u Symbud Myntri Rangbah, Bah Prestone Tynsong ryngkat bad ka Synjuk ki Rangbah Shnong kiba dei na katei ka thaiñ, na kata ka daw ngi kwah ba na ka sorkar ban pynshai ba ngi la rai ban weng noh ïa ka projek ha Lumpongdeng,” ong u Nongai Ktien ka Sorkar ba dei ruh u Myntri ka tnad Sports ka sorkar Jylla haba kren bad ki lad pathai khubor.
Ha kajuh ka por pat u Myntri u la ïathuh ba ka projek jong ka Taj kaba don ha ka jingtei barim ha Orchid Umïam, kane ka kam kan ïaid beit. Kane ka rai ba ka sorkar ka shim kadei ha ka sngi kaba 12 jong ka jingshah thngan kaba la pynlong da ka Green Tech Foundation.
Hadien kane, na ka liang ka sorkar ka la phah da ka jingthoh sha ki nongïalam ka GTF haba ïadei bad katei ka rai.
U Myntri u la ïathuh ba ha ka jingkynduh bad ka Synjuk ki Rangbah Shnong ka jingïakren hi ka long ba ki kwah ban pyndam noh ïa ka projek ha Lumpongdeng. U ong ruh ba ka Synjuk ka la kyntu ba ki kwah ba ka projek ha ka jaka ba don ka Orchid Umïam kan ïaid beit shakhmat.
U Myntri u la ïathuh ba naduh kaba sdang hi ka sorkar ka la dep ban pynshai ba ka projek ha Lumpongdeng kam dei satia kaban don ïa ki jingtei kiba neh junom namar ka thong hi ka long ban pynlong ïa katei ka jaka kum ka jaka ïaid pyngad na bynta ki nongjngohkai pyrthei.
Shuh shuh u ong ruh ba ha ka jingïakren kaba sani bad khamtam haba ki Synjuk ki Rangbah Shnong kiba don lang ka bynta kaba khraw halor kane, ki la pynpaw ïa ka jingsngew jong ki paidbah, kumta na ka sorkar ruh ka burom ïa ka sur jong ki paidbah. “Dei na kata ka daw ngi la rai ban pyndam noh ïa kane ka projek Lumpongdeng,” ula bynrap biang.
Na ka liang u Nongai Ktien ka sorkar ha kajuh ka por u la kyrpad ïa ki dkhot ka Green Tech Foundation ba kin weng noh ïa ka jingïakhih shah thngan. “Ngi kwah ban kren da kaba shai ba ka sorkar hi kam don kano kano ka jingthmu ba rieh bad ngi skhem halor kata ka nongrim. Kumta ngi kyrpad ïa ki dkhot ka GTF ba kin pynsangeh noh ïa ka jingshah thngan namar ngi ruh ngi la sngap ïa ka jingdawa jong phi.”
Shwa kane, u Myntri u la ong ba ka sorkar hi kan ym lah da lei lei ban ai kam sorkar ia baroh bad dei na kane ka daw ka pyrshang ban wanrah ia ka Taj Group kaba dei ka kompeni kaba pawnam khnang ba bun ki samla kin ioh kam ioh jam.