Shillong, Iaiong 20 : Ka Synjuk ki Rangbah Shnong ka Ri-Bhoi District ha ka Lah Sngi U Blei ki la ai ka jingkyrshan ba pura ïa ka jingtyrwa ka Sorkar Jylla ban tei ïa ka 5-Star hotel ha ka jaka ka Orchid Lake Resort ha Umiam, hadien ba ka Sorkar kala kular ban pynsangeh noh ïa ka project kam jngohkai ha dewlynnong Lumpongdeng.
`ïa kane ka rai la shim hadien ka jingïalang bad u Symbud Myntri Rangbah ba khmih ïa ki kam Pohïing bah Prestone Tynsong.
Haba kren sha ki nongthoh khubor, u General Secretary ka Synjuk Bah Pynwanbor Sylliang ula ong “Ngi pynpaw ïa ka jingsngewnguh ïa ka Sorkar MDA ba ka wanrah ïa ka project ha ka district. Ngi kren shai ba ngi kyrshan pura ban tei ïa ka Taj Resort & Spa ha ka jaka ba 30 acre jong ka Orchid Lake Resort ha Umiam. Hynrei, ngi Kyrpad ïa ka Sorkar ban pynsangeh shuwa ïa ka project kam jngohkai ha Lumpongdeng tad haduh ba ngin da rai da kumwei”.
Ula bynrap ” U Bah Prestone ula pynshai ba ka jingtei ïa ka hotel kan long ha ka jaka ba ïeng ka Orchid. Kumba long mynta, ka Orchid ka la treikam la bun bun Snem bad ka por kan sa poi ba kan sa khyllem. Shuwa ba kan jia, ka Sorkar Jylla ka la wanrah ïa kane ka project jong ka Taj Resort ha ka jaka ka Orchid ha Umiam.
Halor ka dewlynnong Lumpongdeng, u Bah Sylliang ula ong ba ka Synjuk ka la kyntu ban pynsangeh shuwa.
“Haba ïadei bad ka dewlynnong Lumpongdeng, kumba ngi ïohi ba ki riewieid mariang ba ïakhih pyrshah ïa kane. Ngi la Kyrpad ïa ka sorkar Jylla ba kan pynsangeh shuwa ïa ka project kam jngohkai ha Lumpongdeng, ïa kaba u Dy CM ula ai ka jingkular. Hynrei u pyntip ba ka project Taj Resort kan sa sdang treikam noh shen ha jaka ka Orchid” ula ong.
U Bah Sylliang ula pynpaw ba ki san dorbar Shnong kiba don ha ka thaiñ Umiam ki la kyrshan ïa ka project. ” Ngi sngewthuh ba ka project kan ai jingmyntoi ïa ki Kynhun ba don bynta na ki san tylli ki Shnong ka thaiñ Umiam. Ngi la ïakynduh ruh ïa ki san dorbar Shnong bad ïakren halor ka project bad kila pynpaw ba kim kwah ba ka Sorkar kan rah noh shawei ïa kane ka project na Umiam hadien ba ïohi ba bun ki Nongialam ki la tyrwa ïa ki jaka jong ki na ka bynta ka project” ula ong.
Ula kdew ïa ka jingtyrwa ba dang shen ban rah noh ïa ka project, “Ngi la ïohi hynnin ba u Symbud Myntri Rangbah Bah Sniawbhalang Dhar ula tyrwa ïa ka Sorkar ban rah noh ïa ka project sha Wahiajer. Kumta, ka project ba thmu ïa ka Ri-Bhoi District ka dei ban neh ha Ri-Bhoi namar kam dei tang ka Umiam kaba don jaka hynrei ngi don kiwei ruh ki jaka ha kiwei ki jaka ban pyntei ïa kum kane ka project” ong u Bah Sylliang.
Namar kata, ka Synjuk kam kwah ba kane ka project kam jngohkai kan ïaid lait noh na Ri-Bhoi District” ula bynrap.
Halor ka lad pynïasoh,ula ong ba ka hotel kan ïahap bha bad ka jingdon ka Umroi Airport.
