Tur ki paidbah sha ïing u Minister bad ki MLA ban dawa kren halor ka Reservation Policy

Shillong, Jymmang 22: Ki paidbah na kylleng kylleng ki jaka ki la ïa mih ban ai ka jingkyrshan ïa ka jingdawa ban pynbeit thymmai ïa ka Reservation Policy bad kumjuh ban ai jingkyrshan ïa ka jingshah thngan u Bah Ardent Basaïawmoit hakhmat Secretariat.
Ha Mawthadraishan ki paidbah ki la ïa mih ha Steshon ban pynlong ïa ka sit in demonstration bad kumjuh ruh la pynlong ïa ka jingïalang ban pynshai halor ka jingdonkam ban pynbeit thymmai ïa kane ka Polisi bhah kam. Hadien kane ka jingïalang la leit ai ruh da ka jingthoh kaba la ïasoi da ki paidbah ha ïing u Bah Shakliar Warjri, MLA Mawthadraishan bad Myntri ka sorkar ba un kren ïa kane ka mat ha ka Kynhun Myntri.
Ha Mylliem, ki Samla bad ki longkmie ki la ïa tur sha ïing u MLA ka Mylliem, u Bah Ronnie Lyngdoh da kaba rah ruh ryngkat ki Placard ban dawa ba u MLA jong ki, udei ban kren halor kane ka mat kaba la ktah jur ïa ki Samla.
Ki nongkyrshan ka VPP Mawsynram kiba la rah ryngkat ki banner ki la ïa tur sha ka ïing ba sah u MLA Mawsynram, u Bah Ollan Suiñ. U Dr. R. Shangpliang, u nongïalam kane ka Kynhun, u la ong ba kane ka jingleit jong ki sha ïing u MLA ha Mawlai ka long ban ïakynduh ban ïakren bad u balei ba um shym la kren ïa ka Reservation Policy. Hynrei u MLA um shym la don ha ïing, tangba na ka liang kine kiba la tur sha ïing jong u, ki la kyntu ïa u MLA ka UDP ba udei ban kren ïa kane ka mat. “Wat lada u MLA jong ngi, udei na ka UDP kaba ïatreilang bad ka sorkar, hynrei ha kaba ïadei bad ka mat jong ka jaidbynriew, um dei ban kheiñ Party dei ban kren beit”, la ong u Bah Shangpliang.
Ha Amlarem ki paidbah bad ki nongialam bad dkhot ka VPP Amlarem, ki la ïa mih ban shong da ka sit in demonstration ban dawa na u MLA jong ka Amlarem, u Bah Lahkmen Rymbui,MLA ka UDP ba un kren halor kane ka mat kaba la ktah palat ïa ki Samla bad kumjuh na ka bynta ka lawei jong ka jaidbynriew.