Sdang ka jingiakhih shong shah thngan u Bah Ardent ha khmat Secretariat halor ka Reservation Policy

Namar ki pyrkhat beit tang ïa ka elekshon ki kynnoh ba ngi leh politik

0

Shillong, Jymmang 23: U MLA jong ka Nongkrem uba long ruh u President ka Voice of the People Party (VPP) u Bah Ardent M Basaïawmoit ha ka sngi Ba-ar u la sdang ïa ka jingïakhih shong shah thngan ba khlem buh por ba la synran lang da ki nongïalam ka party ha lynti ïaid kjat kaba don ha khmat ka Secretariat ban pynbor ïa ka sorkar jylla ban pynkylla ïa ka Reservation Policy.
Haba ka jingïakren sha ki lad pathai khubor u Bah Ardent u la u la ong ba ka jingïakhih jong u ban dawa pynkylla ïa ka Reservation Policy ka dei namar ka sorkar ka ïai kuman ban sngap ïa kaba ka party ka la ai jingmut.
“Nga ïohi ba ka don ka jingong ki nongïalam jong kiba bun ki seng saiñ pyrthei ba ka VPP ka dei ban leit sha kashari ban dawa pynkylla ïa kane ka polisi bhah kam hynrei nga kwah ban kren da kaba shai ba ka jingkwah jong ki ban ngin leit sha court ka long ba ynda ka kashari kan pynksan ïa ngi kin pynkit pap ïa ka VPP hynrei na ka liang jong ngi ngim kwah ban leit sha Court hynrei ba ka jingpynkylla kan dei beit da ka jingsngewthuh jingmut lang na baroh arliang mamla,” ong u Bah Ardent.
Haba pynphai nia ïa ka jingkynnoh u MP Rajya Sabha uba dei ruh u State President ka NPP u Dr WR Kharluki ba ka jingdawa pynkylla ka VPP ka dei tang ban myntoi ha ka elekshon MDA u Bah Ardent u la ong, “Namar ha ki te lada ki leh ïa kano kano ka kam kan dei beit na bynta ka elekshon bad kim kot jingmut hi kham palat ïa ka elekshon ruh”.
“Ha ka VPP kam buh hakhamt na byta ka elekshon hynrei na bynta ka 40 bad 50 snem ban dang wan ki khun samla bad ka lawei ban dang wan,” u la bynrap.
Haba ïadei bad ka jingong u Dr WR Khalukhi ba ka jingdawa ka VPP ban pynkylla ïa ka Reservation Policy kan pynpoi ïa ka jylla ha ka juh ka apot kumba la mad ka jylla jamu and Kashmir u Bah Ardent u la ong, “Kam dei shuh ka jingkren ha ki jingphohsniew hynrei ka la dei ka jingkren ruma bad ka jingkren biej jong u ban pynïahap ba ka jingdawa jong ngi ka long kum ka jingïakhih ha Kashmir nga kwah ruh ban kylli hato lada kumta ngim don hok shuh ban pyrshah ïa kino kino kino ki polisi ka sorkar kiba ktah ïa ngi bad hato ngin long ñiang kohnguh beit ïa ka sorkar katba ka leh lada kumta dei na kata ka daw u Nongaiktien ka party u la ong ba kadei ka jingkren ramïa, ka jingkren lamwir bad ka jingpyrkhat shiteng khlieh, jong ki nongïalam ka NPP”.
La sakhi ruh ba na ka liang ki doktor na secretariat Health Clinic ki la wan ban eksamin ïa ka koit ka khiah u Bah Ardent ha kane ka jaka ba u shong shah thngan.
Ha kane ka jingïakhih shong shah thngan u Bah Ardent la ïohi ba kiba bun ki nongïalam seng bhalang ki la wan ban ai mynsiem halor ka jingdawa jong ka party.

Leave A Reply

Your email address will not be published.