La hapoh ka riti synshar ka ri India ne shabar ngi kwah ban ïoh jingithuh kyrpang ïa ka ri bad jaidbynriew : HNLC

Shillong Jymmang 23: Ka Hynniewtrep National Liberation Council (HNLC) ha ka sngi Ba-ar ka la pynpaw ba ka mat kaba kum ka seng ka kwah ka long ba ka ri bad ka jaidbynriew kan ïoh ïa ka jingithuh la hapoh ka riti synshar ka ri India ne shabar.
Ha ka jingïakren kaba nyngkong eh sha ki lad pathai khubor hadien 35 snem naduh ba la seng ïa ka ha MeECL IB ha Umïam ba la wan shim bynda da u Vice Chairman u Bah Manbhalang Jyrwa, u Political Secretary u Bah Aristerwell Thongni bad ki arngut ki PSO ba kynhtup ïa u Bah Storgy Lyngdoh bad u Bah Raymond Lapang.
U Vice Chairman ka HNLC u Bah Manbhalang Jyrwa u la ïathuh ba kumba ïa ka seng la pynkha halor ka nongrim ban ieid kyrpang ïa ka bri u Hynñiewtrep ne Hynñiewtrep Nationalism bad ba ka jaidbynriew ka dei ban ïoh ka jingïada ba kyrpang bad ka jingithuh ïa ka jinglong trai ïa ka ri.
“Ngi long ka Jaidbynriew ka bym don ïa ka ri lajong (Stateless nation), kumba long kiwei ki jaidbynriew namar u Mizo u don ka Mizoram, u naga u don ka Nagaland hynrei ngi te ngim pat don satia ïa ka jingithuh kaba kyrpang ba ngi dei ki trai jong kane ka ri bad na kata ka daw ngi sngewthuh ba kum ka jaidbynriew ngi donkam ban ïoh ïa ka jingithuh kaba kyrpang la hapoh ka riti sysnhar ka ri India ne shabar jong ka ruh,” u la ong.
U Bah Manbhalang u la ïathuh ba ka jingwan ki dkhot ka seng shapoh ka jylla Meghalaya kadei thik ban ïakren ïasuk ym ban pyndem wait shaka sorkar jylle ne sorkar pdeng.
“Da ka jingwan ngi kyrmen ba lehse ki kynrum kynram kiba ka ri ka ïatyngkhuh la bad ka sorkar jylla ne bad ka sorkar India yn lah ban pynbeit bad ngi sngewthuh ba kane ka kam dei ka kam kaba lah ban urlong noh mynta mynta hynrei ka long kaban bam por bad kum ka seng ngi kwah ba kane ka jingïakren kan long kaba seisoh,” u la ong.
Haba kylli ïa ki mat ki kyndon kiba ka seng kan buh ha ka jingïakren na ka liang u Bah Manbhalang u la kyntait ban pyntip, ‘ka por kan poi ba ngin sa pyntip namar ka formal talk kan sdang ha une u Jylliew ngim pat lah ban ïathuh lut ïa kiei kiba ngi dawa hynrei ka ILP, ka jingwan buhai shnong ki poiwir, ka ktien Khasi, ka jingïada ki paradoh parasnam ba sah ha ki thain khappud, ka Instrument of Accession bad ka annexed Agreement kin dei ki katto katne ki kyndon kiba ngin buh,” u la ong.
“Ka seng HNLC kam dei ka seng ba pyrshah ïa ka ri India ne kaba pyrshah ïa kiwei ki jaidynriew ne ïa ki niam kum Hindu ne Muslim hynrei kadei ka seng kaba ieng halor ka hok, ka jingshisha bad ka hok u khun bynriew” u la bynrap.
Haba kylli ïa ka jingdon ki dkhot ka seng u Bah Manbhalang u la ong ba ynda ka formal talk kan sdang dei tang ha kata ka por ba kin sa ïohi katno ngut ki dkhot ki don.
“Dei tang ynda la dep ka formal talk kaba nyngkong ba ngin sngewthuh la kan sei soh ne em bad dei ha kane ba ngin sa rah ïa ka mat ba ngi buh bad lehse lada ka biang ka jingïakren ngin soi ïa ka soskular sahngeh ïasiat. Dei ynda la sdang ka formal talk ngin ïakren ruh ïa ka jingpyndam lut ïa ki mokotduma (general amnesty) ba la ujor da ka sorkar ne ki tnat treikam jong kaba kynthup naduh ka NIA bad kiwei kiwei ki la ujor pyrshah ïa ngi ba ka jingïakren kan ïaid bad ki dkhot kiba dang don shabar ri ruh kin wan ban shim bynta ha ka jingïakren,” bynrap u ksiang jong ka HNLC u Bah sadon Blah.