Ther ka seng HNLC ïa ka sorkar Congress ba leh bym suidñiew ïa ka jingtyrwa kren ïasuk

Shillong, Jymmang 23 : Ka seng Hynniewtrep National Liberation Council (HNLC) mynta ka Sngi Ba Ar ka la ther tyngeh ïa ka sorkar Congress kaba mynshwa halor ka jingleh bym suidñiew ïa ka jingtyrwa kren ïasuk ka Seng.
U Vice Chairman ka HNLC u bah Manbhalang Jyrwa haba kren ha ki lad pathai khubor u la ong ka jingkren ïasuk haka jingshisha ka la sdang naduh u snem 2000. “ Ha kaba sdang dei I (L) Rev PBM Basaiawmoit bad hadien kata ka Myntri Kam Pohïing Kong Roshan Warjri ha ka por ba synshar da ka Congress hynrei kine ki jingpyrshang kim poi shano shano ruh” ong u bah Manbhalang.
U la ong ka sorkar Congress ka la ïasoi ïa ka soskular kren ïasuk bad ka seng ANVC ha Garo Hills hynrei ka lehklet ïa ka seng HNLC.
“ Ka sorkar MUA ba ïalam da ka Congress ha kaba ïadei bad ka seng ANVC ka la leh nadong shadong, la ïasoi ïa ka soskular kren ïasuk bad soi ruh ïa ki kyndon kren ïasuk hynrei ha kaba iadei bad ka seng HNLC pat ka khlem leh ei ei la shu leh bym suidñiew beit ïa ka jingtyrwa jongngi” ong u bah Jyrwa.
Haba ïaroh ïa ka sorkar ba la ïalam da ka NPP ka Meghalaya Democratic Alliance,(MDA) une u nongïalam ka seng HNLC u la ong “ Kane ka sorkar ba mynta ka la pynpaw shisha da ki kam ba ka shim khia ban kren ïasuk bad ka Seng. Dei na kane ka daw ba ngi la don hapoh ka jylla mynta”.
Halor ka jingkylli u la ong “Ka seng HNLC kam pat pynsangeh ïa ki jingtreikam jongka namar ngi ruh ngi dang ïoh tang ka lynti ïaid kaba shngaiñ bad ïa kata ka jingpynsangeh ïa kino kino ki jingtreikam ha kano kano ka bynta yn sa ïakren ïa pynbeit kham hadien”
U la ong ruh ba um kwah ban batai lut nadong shadong shwa ban sdang ka jingïïakren namar ka jingïakren kan sdang ha ka taiew ba nyngkong u bnai Jylliew. Nalor kata u kyntait ruh ban i\thuh ïa ka jingdon ki dkhot jongka seng kumba long mynta.