Triang pyneh ka KSU ban pyrshah beit ïa ka Food Court bad dawa tei da ka Facilitation Centre ha Umling

Nongpoh, Naitung 02: Hadien ka jingleit pynsangeh ka seng Khasi Student Union ïaka jingshna ïaka Food Court ha Umling haka jaka bala thmu ban tei ïaka Facilitation Centre, u Deputy Commissioner ka Ri-Bhoi District mynta ka sngi u la khot ïakren ïaki nongïalam ka KSU ha kaba ïadei bad katei ka mat bad ka jingthmu jong ka sorkar.
Ha katei ka jingïalang la donlang naduh u Dr. Abhishek Saini Deputy Commissioner ka Ri-Bhoi, u Giri Prasad Superintendent of Police, u Bah B. Nongkynrih Tourist Officer ka Ri-Bhoi, u Bah Erick Dkhar BDO ka Umling bad ki nongïalam ka KSU North Khasi Hills District hapoh ka jingïalam u Bah Ferdinald Kharkamni kum u President lem bad ki dkhot.
Haba kren sha ki lad pathai khubor hadien ka jingïalang bad u DC kaba la neh kumba katto katne kynta, u Bah Ferdinald Kharkamni u la kren shai ba ka seng kam pyrshah ïaka Food Court, kaba la thmu ban tei bad kum ka seng ka kloi ban pdiang hynrei ym ha katei ka jaka bala thmu ban tei ïaka Facilitation Centre ba kum ka seng kala ïakhun naduh ki snem ba mynshuwa ban pynurlong bad pyntreikam ïaka MRSSA katba ym pat ioh ïaka ILP.
U la ong ruh ba kum ka seng ka sngewsih ba ha katei ka jingïakren bad ki bor district ka Ri-Bhoi ba ngim dei ban pynsangeh ïaka roi ka par bad ka iohkam iohjam, bad lada ka dei ha kata ka rukom balei ka sorkar kam sngap ïaka jingdawa ka seng ba dei ban buh da ki camera haba don ki interview naka bynta ki kam sorkar haka Grade I, II bad III ban khuid ka thungkam thungjam bad ki samla ba dei hok ki dei ban ioh.
Haba pynkynmaw ïaka jingïaid lynti ka seng naka liang u Bah Ferdinald u la ong ba naduh ki snem 2013 ter ter ngila dawa ïaka ILP, bad ha u 2016 la pynkylla aiñ noh ïaka MRSSA bad dei ha u snem 2019 naka liang ka sorkar kaba rim kala ai jingmut ba ka don ka jaka kaba 15 akar ha 19 mer ban buh ïaka Entry bad Exit Point namar ka jaka ka heh bad kylluid bad lait naka dheng kali hynrei namar ba ka long lum palat la wad noh shawei ka jaka bad la ioh ha Umling ka jaka kaba don kumba 2 akar kaba dei jong ka tnad Transport.
Dei ha ka 20 tarik Nohprah 2020 la ioh ban plie ïaka Facilitation Centre ha Umling da u Bah Prestone Tynsong symbud myntri rangbah ka jylla, bad la pynshai ruh ba kin don shibun tylli ki kamra jong ki tnad treikam bapher bapher ka sorkar bad kumjuh ruh ka Cafeteria kaba ki nongleit nongwan ki lah ban shongthaid bad bam haka por ba ki pynshisha ïaki kot ki sla shuwa ban rung sha ka jylla bad kum ka seng kala pdiang ha katei ka por, la ong u Bah Ferdinald, hynrei mynta pat baroh katei ka jaka bala buh ïaka Facilitation Centre la wanrah pynban da ki dukan bam suda bad kane ka ktah shikatdei ïaka seng bad kiwei de ki seng kiba la don bynta lang.
“Ngim pyrshah ïaka Food Court, ngi kloi ban pdiang ïa kane ka project ha kano kano ka jaka ha Ri-Bhoi hynrei ngim ailad bad ngin pyrshah lada phi wanrah haka jaka ba ngi la ïakhun naduh mynshuwa kaba dei ka jaka ba biang ban pynlong kum ka Facilitation Centre” la ong u Bah Ferdinald da kaba bynrap ruh ba kum ka seng kam don jingtip ïa katei ka jingthmu tad haduh bala pynieng syndon da katei ka Food Court.
Namarkata naka liang ka seng kumba la pynsangeh ïaka jingpyntrei, da kawei ka sur kan pyrshah beit ïa katei ka jingthmu katba ka sorkar kam pat lah ban pynthikna ban wanrah bad tei noh da ka Facilitation Centre kaba dei ka jaka ba ngin pdiang ïaki briew nabar la ki dei ki nongjngohkai, ki samla pule, ki nongtrei sorkar bad kumta ter ter, katkum ki kyndon bad ki kot ki sla bad namar ka jingkhapngiah katei ka jaka kum ka seng kala ai jingmut ruh ban pan shuh shuh naka tnad Transport ban lait naka dheng kali bad hakajuh ka por kan long ruh ka jingtehlakam ïaki kam sniew khamtam u drok lyngba ka jingdon kitei ki jaka talasi.