Kane kam dei tang ka jingtei hynrei ban wanrah ïa ka rukom treikam ba khlaiñ: Conrad

Shillong, Naitung 02: U Myntri Rangbah Conrad K Sangma mynta ka sngi ula plie paidbah ïa ka Meghalaya Teachers Training Academy (MTTA) ha ka jingdonlang u Myntri ka tnad Pule Puthi Bah Lahkmen Rymbui, ki Heh Ophisar bad ki kynhun ba don bynta na ka kam pule dangle.
Haba ai jingkren ha ka jingïalang, ula ong ba katba ka jingtei dalade ka dei kaba la dep ban plie kham hashuwa, ‘mynta ka sngi ka pyni ïa ka jingsdang jong ka academy, ka thong jong ka, ka jingthmu jong ka bad ka jingtreikam jong ka”.
Haba ai khublei ïa ka Tnad Pule Puthi, ula ong, “Kane kam dei satia tang halor ka jingtei, ka dei halor ka jingwanrah ïa ka rukom treikam ka ban pynkhlaiñ ïa ka nongrim jong ka pule dangle ha Meghalaya. Kane ka academy kan shim ïa ka bynta kaba donkam bha ha ka ban weng ïa ki jingduna kiba la slem bha, khamtam ha ka jingai jinghikai pyntbit ïa ki nonghikai”.
Ka jingthaw ïa ka MTTA kala wan kum ka jubab ïa ki jingeh ba hakhmat eh kiba la pynpaw ha ka National Assesment kum ka PGI 2.0 bad PARAKH Rashtriya Sarvekshan 2024, kaba la buh ïa ka Meghalaya ha ka kyrdan ba sha trai duh (Akanshi-3) ha ka Students Learning Outcomes ne jingmih ba ki khynnah skul ki ïoh na ki jingpule.
Ki jingkheiñ ki batai ruh ba tang 17% na ki nonghikai hapoh ka Jylla kila ïashim bynta ha ki jingpyntbit ïa ka kam ba ki trei ha ki snem ba la leit noh.
Haba shimkhia ïa kane, ka Sorkar ka la kynriah noh na ki jingpynlong ïa ki jingai jinghikai ne workshop ba shisien lano sha ka rukom treikam kaba la pynbeit ryntih, ka jingai jinghikai pyntbit kaba ïai bteng khlem sangeh. Ïa ka MTTA la seng kum ka shnat treikam ba laitluid hapoh ka Meghalaya Societies Registration Act, 1983, kaba don ïa ka jingkyrshan kaba khlaiñ ha ka jingpynïaid kam bad ka jingkhmih beit beit da ki briew kiba don ha ka kyrdan ba halor tam.
Ula kubur ïa ki jingkyllaiñ ki kam ha ka ban pynkylla ïa ka kam pule puthi bad ong “Ka pule puthi ka long kum u ksai ba sohkyrdot, lada phi tan eh palat ïa uwei u ksai ba sohkyrdot, uwei pat u nang skhem. Ngi dei ban law suki suki ïa u ksai ba sohkyrdot,” ula ong haba ban jur ba ki jingkylli kiba don jingmut ki donkam ïa ki jingpyrshang ba ïai bteng ban ïa ka jingpynbeit ba hak dak.
Ula kren halor ki rai ba kongsan ba la shim da ka Sorkar, kynthup ka jingpynbeit ryntih ïa ka jingsiew jong palat 23,000 ngut ki nonghikai SSA, ka sienjam kaba hap ban pynlut pisa jan kumba T.800 klur ha ka shisnem. “Kine ki dei ki rai kiba eh hynrei kiba donkam,” ula ong.
Ka MTTA ka wanrah ïa ka rukom treikam “Hub-and-Spoke” model, ha kaba ka academy kan long kum ka Apex body kaba ïasoh bad ki DIET bad ki CTE ha baroh ki district. Kane ka pynthikna ba ka training kaba bha bad kaba janai kan poi sha ki nonghikai kaba long markam ki jaka trei jong ki, bad ban pynduna ïa ka jingshim ïa ka por jong ki ban don ha ki skul.