Da ka Fisheries Cluster thmu ka Sorkar jylla ban myntoi palat hajar ngut ki nongri dohkha

Shillong, Naitung 02 : U Myntri Rangbah ka Jylla, u Conrad K. Sangma, u la pyntip ba ka Sorkar Meghalaya ka dang wad ki lad ki lynti ban don noh da ka Fisheries Cluster bad ban kyntiew ïa ki jingtei kiba ïadei bad ka kam ri dohkha ha ka jylla kaba lah ban pynmyntoi ïa palat 1,000 ngut ki nongri dohkha.
Haba pynpaw ïa kane lyngba ka rynsan social media, u Myntri Rangbah u la ong ba ka projek ka thmu ban seng ïa ki unit kiba kyrpang hapoh ka Fisheries and Aquaculture Infrastructure Development Fund (FIDF).
“Ngi la ïa kren bniah halor kumno ban seng ïa ka Fisheries Cluster bad ban pynbiang ïa ki jingdonkam kiba ïadei bad ka kam ri dohkha ha Meghalaya, khnang ban pynmyntoi ïa palat 1,000 ngut ki nongri dohkha lyngba ki unit kiba kyrpang hapoh ka Fisheries and Aquaculture Infrastructure Development Fund (FIDF),” la ong u Myntri Rangbah ka jylla.
U la ïathuh ruh ba ïa kane ka projek yn pyntreikam da ka jingïatreilang bad bun tylli ki kynhun bad ki jingïadon bynta ban ai jingïarap pura ïa ka kam ri dohkha.
Katkum ka jingïathuh jong u, ïa ka projek yn pyntreikam da ka jingïatrei lang ryngkat bad ka National Fisheries Development Board (NFDB), ka NABARD bad ka Uday Aqua, kiba yn ai jingïarap ha ka liang ka technical, ka jingpynïasoh ha ka ïew ka hat bad ka jingai jinghikai bad pynkhlaiñ ïa ka jingpynmih bad ban kyntiew ïa ka kam ri dohkha kaban pynbha ïa ka ïoh ka kot jong ki nongri dohkha ha Meghalaya.