Shillong, Nailar, 31: Ka sorkar jylla ka la don ka jingmut ban pyntreikam noh ïa ka Meghalaya Journalist Welfare Scheme (MJWS) 2024. Ïa kane la pyntip da ka Myntri ka tnat Information and Public Relations ka kong Ampareen Lyngdoh haba jubab ïa ka jingkylli ba la wanrah da u MLA ka BJP na South Shillong u Bah Sanbor Shullai, uba la dawa ïa ka jingdonkam ban pynkiew ïa ka journalist welfare fund da 100%.
Na ka liang ka kong Lyngdoh ka la kubur ba ka Journalist Welfare Scheme 2009 ka dei kaba la rim bad kam ïahab satia haba nujor bad kiwei ki jylla, kiba la kiew ha ki lad pathai khubor.
“Namar kata ngi dang don ha ka kam ban tyrwa noh da ka Meghalaya Journalist Scheme 2024, kaba dei kaba dang thymmai,” ka la ong. Hapoh kane ka scheme ba thymmai, ka Myntri ka la pyntip ba ka sorkar ka tyrwa ban kyntiew ïa ka journalist fund sha ka T. 35 lak da kaba pyrkhat bad ka pisa kumba T. 5 lak (corpus fund) ka dang long kaba duna palat.
“Ka la dei ka jingpynkiew kaba 500% haba wan ka jingjia jong ka jingkhlad noh ki nongthoh khubor, katba ka pisa na ka bynta ban shah sumar ha ka por ba pang ka la kiew na ka T. 50,000 sha ka T. 3 lak,” ka la ong.
“Ngi pynshlur ruh ïa ki nongthoh khubor ban pynrung kyrteng hapoh ka Meghalaya Health Insurance Scheme (MHIS). Ngi la tyrwa ruh ïa ki rukom sumar kiba duna ka jinglut bad baroh kine ki dang don hapoh ka jingtyrwa,” ka la bynrap. Haba phai sha ka jylla kaba marjan kum ka Assam, kaba ai ïa ka bai bam tymmen na ka bynta ki nongthoh khubor ba la shongthait, ka kong Lyngdoh ka la ong ba kane ka kam mynta ka don hapoh ka jingpynkhreh.
Shuh shuh ka Myntri ka la pynpaw ruh ïa ka jingshisha ba ki don katto katne ki nongthoh khubor kiba mad jingeh ne ki bym ïoh thikna ka jingsiew.Katkum ka jingong jong ka, ka ïathuh ba ki la don ki sienjam ban pynthikna ba ki nongthoh khubor kiba ïoh duna ka jingsiew kaba long hapoh ka T. 15000 ki la shah kynthup hapoh ka Provident Fund scheme.
Ka la pynbna ruh ba ka sorkar ka la rai ban pynïoh ki ïing sah na ka bynta ki nongthoh khubor.
