Shillong, Nailar 31: Ka Dorbar u Syiem Hima Mylliem, hadien ka jinglap ba dang don ba pynlong ïa ki Dukan, ki Basa ne Godown ha Ïewduh kum ka jaka sahmiet wat hadien ba la pynmih ïa ka jingpynbna na ka por sha ka por la shem ba dang don kiba ïaleh pyrshah ïa kane ka jingmana.
La ong ba ki dang don kiba pynlong ïa ki Dukan, Basa ne Godown jong ki kum ka jaka khalai bad Die Kyiad be-aiñ bad sahmiet kaba la wallam ?a ka jingisait-met ïa ka jinglong kyrpang jong ka Ïewduh kaba long ka ïew kaba heh duh ha Ri Khasi Jaiñtia.
Na ka liang jong ka Dorbar u Syiem Hima Mylliem da ka jingsngewkhia bad ka jingkitkhlieh na ka bynta ka jingbit jingbiang jong ka Ïewduh da kane la khang pyrshah ïa ka jingsahmiet bad ka jingdie kyiad bad khalai be-aiñ ha Ïewduh.
Na ka liang ka Hima ka la pynmih ïa ka hukum ba ka por ban khang noh ïa baroh ki Dukan, Basa Godown kan long 10:00 baje mynmiet bad ruh la bthah ïa ki trai Dukan, Basa, Godown ha Ïewduh ba kin wan register ïa ki Dukan, Basa, Godown jong ki la ki shnong hi ne aiwai shawei pat bad ki jait jingdie jingthied aïu khnang ba kane ka Dorbar kan ïoh ban buh beit buh ryntih.
