Shillong, Nailar 31: Kumba 6 ngut ki ophisar kiba la shah jied thymmai sha ka kam Meghalaya Civil Service ki la shah thung kum ki Assistant Commissioner ha kaba ïa kane la pynskhem ruh da u Lat ka jylla u Chandrshekhar H. Vijayashankar ha Raj Bhavan.
Na ka liang jong u Lat ha ka jingïasyllok bad ki u la kdew halor ki jingdon jong kiba bun ki jait jingthung kiba long dawai kiba ka jylla Meghalaya ka don kiba kynthup kum ki dawai Ayurveda. U la banjur ruh ïa ki ophisar ba kin shim khia ha ki kam pynroi, kum ha ka pule puthi, ka koit ka khiah bad kumno ruh ban pynneh ïa ka sawdong sawkun ka jylla.
Na ka liang jong u Lat u la ai khublei ruh ïa ki ophisar bad pynshlur ïa ki ba kin trei da ka mon kaba bha bad ka jingaiti ïa ka kam na ka bynta ka bha ka miat jong ka jylla.
Kine ki ophisar kiba la shah thung thymmai ki dei Julius R. Marak, Nylla E. Wanniang, Anthony Lyngdoh, Torali K Marak, Freddy Passah bad Chengreng D. Sangma.
Ha kane ka sngi la donlang ruh ka DC East Khasi Hills ka kong Rosette M Kurbah, Superintendent of Police Sylvester Nongtnger bad Assistant Commissioner Richa Kulkarni bad ki la ai ruh ïa ki jingkren ai mynsiem na ka bynta kine ki ophisar.
