Shillong, Nailar, 31: Na ka bynta ban pynithuh ia ki surok ha ki jaka bapher bapher na ka liang ka Congress ha ka sngi Ba-ar, ka la kyntu ïa ka Sorkar Jylla ba kan buh ïa ki jingthoh dak kiba paka ha man ki jaka rung (Entry) bad jaka mih (Exit) jong baroh ki surok ba la ai nam sha ki riewpawkhmat ka Jylla.
“Nga kwah ban kyrpad ïa ka Sorkar Jylla ban buh ïa ki jingthoh dak na ki jaka rung bad jaka mih jong ki surok ba la ai nam sha ki riewpawkhmat,” ong u Bah Ronnie V Lyngdoh MLA ka Congress na Mylliem haba wanrah ïa ka jingkylli bynrap hapoh ka Dorbar Synrai ha ka sngi Ba-ar.
Ula ai nuksa ïa ka surok Jail Road kaba la ai nam ha ka kyrteng u nongïakhun laitluid ka Ri-lum Jaiñtia U Kiang Nongbah, hynrei haduh mynta ka dang ïai neh ka kyrteng kum ka Jail Road.
Kumjuh ruh ka long ïa ka surok kaba la ainam ha ka kyrteng u Mahatma Gandhi, Don Bosco bad kiwei kiwei ki kyrteng jong ki riewpawkhmat.
“Namar kata, kine ki surok ba la jer kyrteng ha ki riewpawkhmat ki dei ïa kaban da buh jingthoh ha jaka ba ïohi bha ki briew, ban ai burom ïa kiwei ki riewpawkhmat kiba la noh synniang sha ka Jylla bad ka Ri,” ong u MLA ka Mylliem.
Halor kane, u Myntri ba khmih ïa ka tnat GAD u Rakkam A Sangma ula kular ba ka Tnad ka la dep ïakren ïa kane ka kam bad ka Tnad Public Works Department (PWD) bad ka Shillong Municipal Board (SMB) ba kin leh ïa kaba donkam ha kaba ïadei bad kane ka jingtyrwa.
U Myntri ula buh jingthoh ruh ïa ki jingai jingmut jong u MLA ka TMC na Nongthymmai Bah Charles Pyngrope ha kaban pynbeit ïa ka kyrteng jong ka Mother Theressa Road sha ka Saint Theressa Road.
