Ther u Chief Justice ïa u nongsaid aiñ ka sorkar Meghalaya

Shillong, ïaïong 28: U Nongbishar ba ha khliehduh ne u Chief Justice jong ka High Court of Meghalaya, u Sanjib Banerjee, ha ka sngi Thohdieng ula ther tyngeh ïa u nongïasaid aiñ jong ka sorkar halor ka mukotduma kaba ïadei bad ka Misc Case Writ Appeal ne ka jingkyrpad biang ka sorkar ïa ka ïingbishar ban khang ïa ki nonghikai kolej kiba la ïoh jingïarap na ka sorkar ba kin ïadon bynta ha ka saiñpyrthei ne ba kin ïeng elekshon.
Haba shim bishar biang mynta ka sngi ïa ka mukotduma State of Meghalaya vs Shri Brightstarwell Marbaniang & Ors, u Justice Sanjib ha ka Oral Observation jong u la ong ïa u nongsaid aiñ jong ka sorkar, “Phi mut ban khang ïa ki Nonghikai kiba la biang ka kyrdan pule, ka mut me kwah ba ki Class I, Class II ki riew runar ban long ki nongthaw aiñ?”.
“Wat ha ka jingïatai ha ka Constituent Assembly ruh ka don ka jingïakren ba kan da don ka kyrdan pule ïa kino kino kiba kwah ban long kum ki nongmihkhmat la ha ka Assembly ne Parliament. Ka kam ki nongmihkhmat kadei ban thaw aiñ, kumno yn aiti ban thaw aiñ ha ki briew ki bym don jingnang jingstad”, la ong u Chief Justice.
U Chief Justice, u la ong ruh ba ka Riti Synshar jong ka ri India kam khang ïa uno uno u nong India ban ïashim bynta ha ka saiñpyrthei ne kino kino ki kyndon aiñ lada ka kam kaba ki trei kam hap ha ka thup jong ka kam bam ar maloi ne Office of Profit. U la ong ruh ba balei yn khang ïa ki samla kiba la biang ka jingnang jingstad napdeng kiba bun ki nonghikai ban long ki nongthaw aiñ.
Na ka liang u nongïasaid jong ka sorkar u la pynpaw ba ka jingïashim bynta ki nonghikai ha ka saiñpyrthei ne ban long ki nongmihkhmat paidbah ka ktah shibun ïa ki khynnah skul namar kin ym don por shuh ban leit ai jinghikai sha ki kolej ba ki trei.
“Haba ïa kito kiba jop elekshon ki hap shim shuti katba ki dang long MLA khlem ïoh tulop bad ïa ka tulop ba dei ban siew sha ki la lah ban khot da kiwei ki nonghikai ban wan bujli katba ki dang shim shuti kumno phin ong ba kan ktah ïa ki samla pule?,” la buh jingkylli u Chief Justice.
Na ka liang u nongïasaid aiñ ka sorkar u la ïathuh ba ka sorkar ha ka hukum ba ka la pynmih ka dei ban khang ruh ba kin bat ïa kino kino ki kam ha ki seng saiñ pyrthei.
“Kaba mut lada kim dei kiba bat kam hynrei kiba leit ban ai jingkren beit man ki jingïalang ki seng saiñ pyrthei hato kum kane kam don jingktah seh,” u la kylli u Chief Justice.
“Kane ka la dei ka lynti Ïakjakor kaba ka sorkar ka shim bad kaban ktah pat ïa ki samla da ka jingkhang lad shim bynta saiñ pyrthei ïa ki nonghikai kiba don ka kyrdan pule,” u la kynthoh.
U Chief Justice u la ong ba na ka liang ka sorkar lyngba u nongsaid aiñ jong ka u dei ban pynkhreh ïa ka jingïasaid kat kum ki kyndon ka riti synshar ha kiwei pat ki sien shong bishar ba ka Kashari kan buh hadien ba na ka liang u Muktiar ka sorkar u la pan por biang.
“Namar ka jingkyrpad ka sorkar ban ai por biang ngin sa shim bishar ha ka taïew ban wan ïa kane ka mokotduma,” ong ka hukum ba la pynmih mynta ka sngi.
Ka sien shong bishar biang halor kane ka mukotduma kan long biang ha ka sngi Palei jong ka 4 tarik.
Lah ban kdew hangne ba ka sorkar jylla ka la ujor mokotduma ban phah bishar biang ïa ka rai kaba la pynmih da u Justice HS Thangkhiew ha kaba ïadei bad ka jingpynksan jong ka HC haba shim bishar ïa ka mokotduma ba la ujor da u Bah Brightstarwell Marbaniang ha ka mokotduma ba la tip kum Shri Brightstarwell Marbaniang & Ors Vs State of Meghalaya kaba pynksan ïa ki nonghikai kolej kiba dei ha ka kyrdan Aided ki lah ban shim bynta ha ka kam saiñ hima sima, da ka jingpyndam ka HC ïa ka Clause 7.4.3 ka Meghalaya Education Policy 2018 bad ka hukum (notification) kaba ka pynmih ha ka 23 Lber 2021 ba la pynkylla ïa ka Aided College Employee Rule.