Shillong, Iaiong 28: U Myntri Rangbah ka jylla u Conrad K. Sangma mynta ka sngi Thohdieng ula ïadon lang ha ka National Seminar halor ka phang “Representation of Women of North East India in Multi – Disciplinary Discourse” kaba la long ha Don Bosco College, Tura.
Ha katei ka seminar la wan ban ïashimbynta da ki riewshemphang na kylleng ki bynta jong ka ri bad ki la ai ruh ïa ki jingthoh kiba kila pynkhreh kyrpang bad ha kane ka jingïalang la ïadonlang ruh u Myntri ka pule puthi u Rakkam A Sangma bad u Prof Sukalpa Bhattacharjee jongka NEHU Shillong campus.
Haba kren ha ka jingïalang, u Myntri Rangbah ka jylla ula ong, ba ka sorkar kala pynwandur ïaka prokram ban pynkup bor ïa ki kynthei lyngba ki kam khaïi pateng bapher bapher bad lyngba ki Selves Help Group (SHG) , ka sorkar kan pynthikna ba ki kynthei kin long kiba khlaiñ ha ka jingïoh jingkot khlem da donkam ban shaniah ha kiwei pat.
Ula pyntip ha ka jingïalang ïa ki jingjia, ha kaba ki longkmie ba dang khynnah ka rta ki don hapdeng ka jingma ha ka jingkha khun namar ba ka khlem pynjlan ïa ka 3 snem ha ka rukom kha khun bad don ruh ki kynthei ba hapoh ka rta ba 23 snem ki la dep ban kha khun haduh 5 ngut.
“Ngi la wanrah ïa ka lad ban weng shi syndon ïa katei ka jingeh ban pynthikna ba ki longkmie kin long kiba koit ba khiah. Ka Safe Motherhood Programme ka shimkhia ïa katei ka bynta jong ki longkmie. Ngi la sdang ruh ïaki sienjam ban pynkup bor ïa ki kynthei ha ka ioh ka kot, da kaba don bynta ha ki kam ban kamai kajih lyngba ki Self Help Group,” ong u Conrad Sangma bad ka bynrap ba ka sorkar jylla ka buh hakhmat eh ban kyntiew ïaka ïoh ka kot jong ki kynthei haka jylla.
Ula pyntip shuh shuh, ba ka jylla Meghalaya kadei kawei napdeng ki jylla ha ka ri, ha kaba 95% jong ki kynthei ha ki thaiñ nongkyndong kidei kiba don bynta ha ka jingpynïaid shakhmat ïa ki Self Help Group bad ki don palat 4 lak ngut ki kynthei kiba trei ha ki SHG ha ka jylla hynrei hashwa u snem 2018 ki don tang kumba 35,000 ngut.
U Myntri Rangbah ula ong ba ki don ki jingeh kiba ki kynthei ki ïatakhuh, hynrei ka sorkar ka dang ïaid shakhmat ban wad ïa ki lad ki lynti ban weng ïa kitei ki jingeh.
Katba u Rakkam A Sangma, ula kren halor u synniang kaba ki kynthei kila noh shi kat dei ha ki liang bapher bapher bad ula kyntu ïa ki kynthei ba kin ïai bteng ha kaban ïakhun ïa ki jingeh bad jingtynjuh na ka bynta ban noh ïa u synniang jongki sha ka imlang sahlang.
