Shillong, Iaiong 28 : U Myntri ba dei peit ïa ka tnad Animal Husbandry bad Veterinary u bah Alexander Laloo Hek mynta ka Sngi Thohdieng u la ong ba ka sorkar shen kan sa tei ïa ka hospital ba nyngkong eh na ka bynta ban sumar ïa ki mrad bad jingri hangne ha nongbah Shillong.
“ ïa ka Detail Project Report (DPR) la pynkhreh mynta ban tei ïa kane ka hospital ha ka jinglut kaba 94 klur tyngka ei ei” ong u bah Hek.
U la ïathuh ka jaka ban tei ïa kane ka hospital kan dei ha Upper Shillong bad u la ïathuh ruh ba yn sa buh jingtyrwa hakhmat ka sorkar pdeng ba kan mang pisa na ka bynta kane ka hospital.
Haduh mynta hi ka jylla kam pat don wat tang kawei ruh ka hospital ban sumar ïa ki mrad bad ki jingri wat la ka la dap 50 snem ka jingïoh jylla ba pura ruh.
U bah Hek ula ïathuh kat haduh mynta ka jylla ka dang don tang ki veterinary dispensary ha East Khasi Hills, Jaintia Hills bad Garo Hills.
“ Kumta ka por ka la dei eh ba ngin don ka hospital ka ban sumar ïaki jingri jingdup bad ki mrad ki mreng bad kan long da shisha ka jingkyrkhu ïa ki paidbah jongka jylla” ong u bah Hek.
U la ïathuh ïa ka DPR yn pyndep ha u bnai ban wan bad hadien kane “ Mar mar ngin wad jingïarap pisa na ka sorkar pdeng khnang ban pynsted noh ïa kane ka kam namar ka long kaba donkam haduh katta katta ban don noh ka hospital ban sumar ïaki mrad bad jingri ha ka jylla. U la ïathuh ba mynta ka tnad ka don 17 tylli ki veterinary mobile unit kiba la pyrshang ban pyntreikam ha ka jylla.
U la ïathuh ba ka jylla ka don palat 264 ngut ki veterinary doctor. “ Kumta tang shu la don ka hospital ka tnad kan sa thaw lad ban pyndonkam ïa kine ki doktor namar kum ka hospital ka dei ban don ruh bun ki doktor, ki nurse bad kiwei kiweik i nongtrei” ong u bah Hek.
