Ther ka RBYF ïa ka kompani ba pynjot mariang bad khlong maw ha Wah Umiam ha jingpyntrei ïa surok Mawhati
Mad jingeh ki paidbah naka tdem pum pum
Nongpoh, Rymphang 13: Ki nongïalam ka Ri-Bhoi Youth Federation Mawhati Circle mynta ka sngi kila ther tyngeh pyrshah ïaka Dhar Construction Company (DCC) jong u Bah Ngaitlang Dhar kaba pyntrei ïa u surok Mawhati halor ka jingdonkti ban pynjot bad pynjulor ïaka mei mariang da kaba khlong ïaki maw na Wah Umiam ban pyntrei ïa u surok naduh Umsning sha Sonidan bad kumjuh ka jingtih maw naka par maw haka thaiñ Mawhati.
Naka liang u Bah Reynold Dkhar President ka RBYF Mawhati Circle u la pynpaw ba kum ka seng ka dap da ka jingsngewkhia ban iohi ba katei ka kompani ka khlong bad pynsniew dur ïaka wah Umiam da kaba khlong ïaki maw na katei wah ban shna ïa utei u surok bad kum ka seng kala byrngem ruh ba lada mih kino kino ki jingjulor ba kham jur ïa katei ka wah khamtam ki doh um kiba im ha katei ka wah naka liang ka kompani DCC bad ka tnad PWD ka dei ban shim ka jingkitkhlieh.
Nalor katei ka jingkhlong maw na katei ka wah naka liang ka seng kala ther ruh halor ka jingpyndonkam katei ka kompani ïaka par maw kaba don harud surok bah ba ïaid ba ieng da ki paidbah kaba lah ban buh jingma bad wanrah ka jingjia ba sngewsih ha kano kano ka por.
Shuh shuh ruh, na ka liang ka seng RBYF, ka la pynpaw ïa ka jingsngewkhia kaba jur halor ka jingkit palat pud jong ki kali dumper jong katei ka kompani DCC bad ki bym ju burom ïaki paidbah kiba ïaid lyngba ka surok Mawhati namar ka jingpum pum bad bunsien ki paidbah ki hap ban bam tdem ha shilynter jong utei u surok u ba ka jingtrei ka dang ïaid shaid shaid, bad kumjuh ruh da kaba ïaid na ki lynti bad surok shnong kiba la shna lyngba ka skhim PMGSY kaba lah ban wanrah ïa ka jingjulor noh jong kine ki surok, kumta na ka liang ka seng ka la maham tyngeh ba lada kine ki surok shnong ki jot noh tang shiteng por na ka jingiaid jong ki kali kit maw katei ka kompani DCC ka dei ban shim ïa ka jingkitkhlieh pat ban maramot ïa kine ki surok PMGSY.
U la ong ruh ba kum ka seng kan da pynlong ka jingjurip bad lada lap ba katei ka kompani ka dang pynjot ïaka mariang naka liang ka seng kam banse ban shim pat da kiwei ki lad ki lynti kiba kham tyngeh, la bynrap u Bah Reynold.