Nongpoh, Rymphang 13: Ha kawei ka jingjia aksiden kali, uwei u samla rangbah u la mynsaw jur hadien ba katei ka Bolero Pick Up kala leit ban tynrah ïaka kali Grand i10 kaba u ñiah.
Kane ka jingjia kala jia hynne ka step haka por 10 baje eiei haka shnong Saiden bad utei u rangbah ba ñiah ïaka Grand i10 (ML 10 B 6966) bad u ba la mynsaw jur ha katei ka jingjia la tip kyrteng kum u Bah Ricky Kharmawlong naka shnong Pahamsyiem, bad u nongñiah jong katei ka Bolero Pick Up (ML 10 C 0948) la tip kyrteng kum u Tanborlang Kharsiang na Mawiong East Khasi Hills.
Katkum ka jingtip bala ioh lum la ong ruh ba katei ka jingjia kala jia namar ka jingpynher sted jong ka Bolero Pick Up ba u nongñiah u don ruh hapdeng ka jingbuaid bad um lah ban tehlakam shuh ïaka kali bad leit thom beit ïa katei ka Grand i10 haduh ba u nongñiah u la mynsaw jur.
Naka liang ki bor pulit jong ka Nongpoh mar mar kila leit sha katei ka jaka bad pynkit noh ïa utei u ba mynsaw sha Civil Hospital Nongpoh ban ioh ka jingsumar bad namar ka jingshitom kaba khamjur la rah noh sha Shillong bad ka jingtohkit halor katei ka jingjia ka dang ïaid shakhmat.
