Khliehriat Rymphang 13 : Ka Khasi Students Union Tongseng Unit, kaba hapoh ka elaka Narpuh (East Jaiñtia Hills District, myn ha ka 10 tarik mynta u bnai ka la rakhe ïa kajingdap shi snem kynthih ka Unit jong ka seng, ha kane ka prokram la ïa don ryngkat lang ki nongïalam ka KSU East Jaiñtia Hills District, ki riew rangbah ba kynthup u Waheh Shnong Tongseng (Narpuh), u bah C.Rymbai, Secretary Shnong, u bah S.Phniaw, ki riew rangbah jong ka shnong, ki longkmie bad ki khun samla jong ka shnong.
Haba kren ha ka jingïalang, u President ka KSU East Jaiñtia Hills District, u bah Streamly.S.Suchen, u la pynpaw ka jingsngew kmen halor ka jingrakhe ka Unit ïa kane ka jingdap shi snem, u la pynkynmaw ïa ka jingïaid lynti ka Khasi Students Union kaba naduh u snem 1978, u la ong ba ha ka jingtyllun jong ka por, ki nongïalam jong ka seng ki ïa leit bad ki ïa wan, hynrei ka nongrim jong ka seng ka dang ïaineh kajuh haduh mynta, u la ai ruh ïa ki kyntien sneng kyntu ïa ki para dkhot jong ka seng bad ai mynsiem bad pynshlur ruh ïa ki ba kin long kiba don ka jingkitkhlieh ha kaba shakri ïa ka ri bad ka jaitbynriew, ban shakri ïa ki para doh, para snam, u la ai ruh ka jingkitbok kitrwiang ïa ka KSU Tongseng Unit ba kan nang ïaid shaphrang ha ki kam ki jam ban ïada ïa ka thaiñ, kumjuh ruh ïa ka ri bad jaitbynriew.
Ki nongïalam jong ka KSU East Jaiñtia Hills District, kiba la ai jingkren ki kynthup u General Secretary, u bah K.S.Suchiang, Finance Secretary, u bah Shaniahskhem Dkhar, Organising Secretary, u bah Olenbat Pdang, u Presidnet KSU Tongseng Unit, u samla W,Shyll bad kiwei kiwei. Ha katei ka prokram la ot ruh ïa u cake, kum ka dak ka jingleh kmen bad la pynbyrngia ruh ïa ki paidbah da ki jingrwai bad jingshad tynrai na ki khun samla jong ka thaiñ.
