Nongpoh, Rymphang 13: Ka Music Video bala ai kyrteng ‘Pukai Jong Phi’ bala shim bynta da u Bah Rijied Khymdeit kum u tyngshop bad ka Iba Banroi Muktieh kum ka puron bala ring dur haka rukom kaba itynnad bad ka jingrwai kaba pynkhih mynsiem ïaki paidbah la pynlait paidbah noh mynta ka sngi haka jingïalang kaba la long ha Nongpoh.
Ïa katei ka Music Video la pynlait paidbah da ki nongïalam sengbhalang naka them Ri-Bhoi naduh u Bah Ferdinald Kharkamni President ka KSU, u Bah Luistar Lyngdoh President ka FKJGP, u Bah Marcus Marten President ka HNYF haka jingdonlang ruh u Bah Cornelius Laloo uwei naki nongthoh khubor ka district, u Paiem Wanphrang Syiem, Sirdar ka Elaka Nongpoh bad kiwei kiwei ki riew rangbah.
Na ka liang kitei ki riew rangbah haba kren ha katei ka sngi kila pynpaw ka jingsngewkmen kaba khraw ba ka kam ak phlim bad pynmih ïaki Music Video kala sdang ban kiew haka them Ri-Bhoi kaba long ruh kum kawei naki rynsan iohkam iohjam ha kum kane ka juk kyrduh kam kaba mynta, kaba dei ruh shibynta ka jingpynriewspah ïaka ktien tynrai kumba katei ka jingrwai la wai haka ktien Bhoi.
Ki la ai mynsiem ruh ïaki tyngshop bad puron kiba la shim bynta ha katei ka jingrwai ba kin dang kiew shaphrang khamtam ba kin dang lah ban pynmih shuh shuh ki jait jingrwai ha ki por ki ban dang wan.
