Ther ka FKJGP ïa ki tnad treikam sorkar halor ka jingnoh shiliang ka bhah kam Kontrak ha Ri Bhoi

Nongpoh, Naiwieng 16: Ka FKJGP North Khasi Hills District na Ri Bhoi mynta ka sngi ki la pynpaw ïa ka jingsngewkhia kaba jur, kaba dei halor ka nongrim ba ka rukom bhah kam ha ki kam Contractor kam long kaba khuid ba suba bad dei tang kito kiba don jingïadei bad ki heh ki hain kiba ioh ïa ka kam bad kiwei pat kiba ym don jingïadei kim ioh satia ïa ka kam.
Haba ïa kren bad ki Nongthoh Khubor mynta ka sngi ha Nongpoh, u General Secretary k FKJGP North Khasi Hills District, u Bah Shanlang Diengdoh, u la ong ba ka daw kaba la pynlong ïa ka seng ba kan kren halor kane ka bhah kam Contract ha ki tnad sorkar bapher bapher, ka dei namar ka don ka jingkren na kiba bun ki Contractor ha Ri bhoi ki la wan ud wan nam sha ka seng ban tuklar lem halor kane ka rukom bhah kam kaba ym long kaba khuid ba suba.
U la pynpaw ruh ba ka seng ka kren ïa baroh ki tnad sorkar la ka dei ka tnad PWD, PHE, Water Resource bad kiwei kiwei ki tnad sorkar haba don ki kam ki jam dei ban leh da kaba khuid b suba bad ym ban ai kam tang ïa kito kiba don jingidei bad ki MLA ne Minister.
U la kynthoh ruh ba ki don ki kam ba ki ai ïa ka open tender tang ban pyndep rukom ba ki Contractor ki thep ïa ki kam bad shu lut ei tang ka pisa ban thep tender, hynrei kiba ioh ïa ki kam pat ki dei tang kito kiba don jingïadei ïa ki MLA ne Minister.
Halor kane ka bynta, ka seng ka dawa ba dei ban bhah kam da kaba khuid ba suba ban ïa myntoi lang ïa baroh ki Contractor bad ym tang ban ai kam tang ïa kiba don jingïadei bad ki heh ki hain. K seng kan buddien halor kane ka jingbhah kam ïa ki Contractor bad lada ka lap ba don ki jingleh shiliang kum ka seng kam banse ban ïaid d kawei ka lynti ban myntoi lang baroh ki Contrctor ha Ri Bhoi, u la bynrap.
Na ka liang u Education Secretary, u Bah Gabriel Sun u la kren ruh halor ka thung kam thung jam na ka bynta ki samla ha Ri Bhoi ba kane ruh ka dei ban long kaba khuid ba suba bad kam dei ban don ka jingleh shiliang khmat ban don kita kiba tuklar da ki MLA ne Minister bad dei ban ioh hok tang kito kiba dei hok ban ioh katkum ka jingstad jongki ha ka eksam thungkam thungjam.
U Samla Sun, shuh shuh, u la pynpaw ruh ba ka FKJGP, North Khasi Hills District Unit kan dang buddien halor ka bhah kam bhah jam ïa ki kam Kontrak bad kumjuh ruh ka jingthungkam ha ki tnad sorkar bapher bapher ha Ri Bhoi bad kum ka seng kan nym ailad ba kan don ka jingleh shiliang ïa ka jingthungkam thungjam ha kaba ka nongrim ka seng ka long ban phai khmat kyrpang sha ki samla kiba ym don kam don jam kaba ki dei hok ban ioh katkum ka jinglah jongki ha ki eksamin thungkam bapher bapher.