Nongpoh, Naiwieng 16 : Na ka daw ka jingsynjor ka Jingkieng Dwarksuid bad kaba la buh jingma lada ïaid ki Kali Kit khia na katei ka Jingkieng kaba dei hadien ka jingtwa ka khyndew, u Deputy Commissioner ka Ri Bhoi, u Arpit Upahdhay mynta ka sngi u la pynjari da ka section 144 CrPC ban khang pyrshah ïa ki Kali ba kit khia ban ïaid lyngba katei ka Jingkieng Dwarksuid.
Katei ka kyndon la shah ban ïaid ki kali ba kit tiar tang kito kiba don hapoh ka jingkhia kaba 30 ton bad palat ïa kata ka jingkhia la khang pyrshah ban ïaid na katei ka Jingkieng.
La pyntip ruh ba la pynjari ïa kane ka kyndon ka dei halor ka nongrim ba katei ka Jingkieng ka la don hapdeng ka jingma ban ïaid ki Kali kit khia bad dei namar kane ka daw lyngba katei ka kyndon la khang pyrshah ïa ki Kali ba kit palat ïa ka jingkhia kaba 30 ton shaneng bad la shah ban ïaid tang kiba don ka jingkhia hapoh ka 30 ton.
Kane ka kyndon kan treikam noh mardor bad kan dang treikam ruh katba ym pat pynbna da kumwei pat bad kino kino kiba ïaleh pyrshah kin shah pynshitom katkum katei ka kyndon aiñ ba la pynjari.
