Khliehriat, Naiwieng 16: Katkum ka jingpyllait khubor jong u bah Daiapherbha Lamare, u ba na Sonapyrdi, u la ïathuh ba u contractor jong ka NHAI, u la mut ban sdang ban maramot noh ïa ka surok national highway 6 ha ka thaiñ, khamtam ha kito ki jaka jong ka surok kiba la julor palat, la ong ruh ba mynta ki nongtrei ka NHAI ki la sdang ban wan pynpoi ïa ki tiar ki tar na ka bynta ban maramot ïa ka surok ha ka thaiñ Narpuh.
La ong ruh ba ki paidbah jong ka thaiñ Narpuh, lem bad ki sengbhalang ba kynthup ka Jaiñtia Students Union Khliehriat Circle, Jaiñtia Stidents Movement bad ka HITO Narpuh Circle, ki la pyllait noh ïa ka jingpakhang surok hynnin ka miet ha ka por 9.30 myn miet, kata dei hadien ba u Extra Assistant Commissioner ka East Jaiñtia Hills District, u bah S.Marwein, u la ïakren sngewthuh bad ki bad kular ba ïa ka surok yn maramot noh mardor hi bad naduh hynnin ka miet hi la sdang ban wan pynpoi ïa ki tiat ki tar ban maramot .
Ki paitbah nongshong Shnong jong ka thaiñ Narpuh ki phah ïa u kyrwoh sha ka sorkar bad sha ki bor synshar district bad maham tyngeh ruh ba lada ka national highway authority of India kam maramot kloi kloi ïa ka surok kumba la dep ïakren shai, ki paidbah kin pynlong biang ïa ka jingiakhi bad pakhang surok biang ha baroh kawei ka surok NH-6 ha East Jaiñtia Hills District.
