Khliehriat, Naiwieng 16 : U symbud myntri rangbah ka jylla, u bah Prestone Tyngsong, mynta ka sngi u la plie donburom ïa u maw nongrim ban shna noh ïa ka surok kaba ha ka jinglut kaba T 126 klur tyngka ha kitei ki thaiñ khappud bad uwei pat u dei u maw ban sah jingkynmaw ïa kito ki longshwa kiba dei ki nongseng ïa ka shnong Huroi, ha kane ka sngi da ki hajar ngut ki paidbah na ki shnong khappud ki la ïa poi sha kane ka prokram ha shnong Huroi.
U bah Prestone u la ong ba kane ka jingplie mawnongrim ka long kum ka jingpynbna paidbah ba yn sdang noh ban shna ïa kane ka surok ha khappud, u la ai ka jingiaroh ïa u bah Kynjaimon Amse, kumjuh ruh ïa ka kong santa Mary Shylla, ki waheh shnong ka thaiñ, kiba ju pynkynmaw ïa u Symbud kongsan man ka por ha kaba ïadei bad kane ka surok.
U muktiar uba dei ruh u Adviser jong ka Joint Action Committee jong ki saw dorbar shnong ba kynthup ka Huroi, Hingaria, Lahalein bad Lejri, u bah K.Amse lem bad ki dkhot ki la pynpaw ka jingsngew kmen halor kane ka jingplie ïa u maw nongrim ha kane ka sngi bad ong ruh ba ynda la dep ban pyntrei ïa kane ka surok kan pynsuk shibun eh ïa ki paidbah ha kitei ki thaiñ khappud bad ong ruh ba ka dei ka jing ap khmih lynti kaba la slem bha kaba naduh u snem 1954, ki da khmih lynti ruh ba ïa kane ka surok yn sa lah ban pyndep noh kham kloi.
Kiba la ïa don ryngkat lang ha kane ka sngi ki kynthup ruh u MLA jong ka Sutnga Saipung bah Shitlang Pale, u Chief Engineer PWD Roads, u bah K.K Mawa, u DC ka East Jaiñtia Hills District, u Superintendent of Police East Jaiñtia Hills District, u Jagpal Singh Dhanoa, IPS, ki MLA ba rim u bah Nehlang Lyngdoh bad u bah Hopeful Bamon, ka kyrtong ban iakhun na ka NPP, ka kong Santa Mary Shylla, ki MDC ka thaiñ, u bah Emlang Lamare bad u Dr Sanky Shangpung bad kiwei kiwei ki nong shah khot sngewbha lem bad ki paidbah ka thaiñ.
