Thaw ki 9 shnong da ka Forum halor ka jingsynjor ka jngkieng Dam ha Umiam

0

Nongpoh, Ïaiong 20: Ki Dorbar Shnong jong ki 9 tylli ki Shnong ka Eastern Ri-Bhoi dang shen, kila thaw ïa ka kynhun Umïam Hazard Area Collective Forum (UHACF), ban pynbor ïa ka Sorkar Jylla ba kan wanrah ïa ki lad jingïada ïaki Nongshongshnong kiba sah sha kjat jong ka Pung Umïam namar ka jingma bad ka jingsyier ïa ka jingbthei jong ka pung na ka jingkieng kaba la shongtor.
Ïa kane ka kynhun la thaw ha ka jingïalang jong ki Rangbah Shnong kine ki khyndai Shnong kaba la long hynnin ka miet 18 tarik Ïaiong ha shnong Mynsain, Ri-Bhoi District.
Ki Rangbah Shnong kila thaw shuwa ïa ka Adhoc Committee jong ka UHACF ïa kiban sa pynskhem ha kine ki khyndiat sngi bad kane ka Committee ka kynthup ïa u Bah Lamang Manik Syiem kum u Legal Adviser, Bah Hillary Shadap Rangbah Shnong ka Umtngam kum u Secretary bad kiwei kiwei.
Ha kane ka jingïalang, ki Rangbah Shnong kila ïatai ruh halor ki jingshah ktah ba khah khah jong ki Nongshongshnong ha ka por ba pyllait um na ka pung Umïam kaba pynjulor lut ïa ki jingthung jingtep bad buh jingma ïa ki mynsiem briew.
Haba kren sha ki lad pathai khubor, u Secretary ka Adhoc Committee Bah Hillary Shadap ula pynpaw “Ka Committee ka dawa ïa ka Sorkar ban wanrah ïa ki lad jingïada ïa ki nongshongshnong bad ki jingthung jingtep la ka dei ka por ba pyllait um na ka Pung Umïam ne lada jia ryngkhat ba bthei ka jingkieng ba den ïa ka um”.
“Ngim kwah ïa ka pisa ba phin ai jingïarap ynda ngi la shem lanot hynrei ngi donkam ïa ki jingïada namar ym don ba lah ban tip ha kano ka por ba ka pung Umïam kan bthei” u la ong.
Kat kum ka jingong jong u, “Kumba long mynta hi, ki nongshongshnong kila don lypa ha tmier jong ki jingma”.
Halor ka jingjulor ki jingthung jingtep na ka jingpyllait um, u Bah Hillary ula ong “Ki Nongrep la bun sien kila mad ïa ka jingduhnong ha ka por pyllait um hynrei kam ju don ka jingai jingïarap na ka MeECL ne na ka Disaster Management”.
Ka AHACF ka dawa ïa ka Sorkar Jylla ba ka dei ban wan jurip ïa ki shnong kiba don hakjat jong ka pung Umïam kiba don kumba 20 tylli eiei bad ki jingshah ktah jong kine ki Shnong ha ka por pyllait um na ka pung bad ka jingma kaba ap ïa ki lada jia ryngkhat ba bthei ka pung ba kum ka sorkar ka hap ban pyrkhat lypa kumno ban thaw ki lad ki lynti ban shna thymmai biang ïa katei ka jingkieng Dam ha Umïam.

Leave A Reply

Your email address will not be published.