Khliehriat, iaiong 20 : Ka long shisha kaei kaei kaba sngewlyngngoh ba ka pisa T10 tyngka nar kam ïaid ïew ha East Jaiñtia Hills District, namar ki nongdie dukan la ki dei ki dukan heh ne ki dukan rit ruh kim ju treh ban shim ïa ka pisa T10 tyngka kaba da ka nar, katba ïa ka T.1, T, 2 bad T 5 tyngka nar pat ki treh ban shim, halor kane, u samla Arkijuh Dkhar, uba na ka shnong Khliehriat, mynta ka sngi u la buh da ka jingthoh hakhmat u Deputy Commissioner bad ong ba ki paidbah hapoh ak disrict kim da mon than ban shim ïa ka pisa T10 tyngka nar ba la pynmih da ka Reserve Bank of India.
U la pynpaw ba watla kane ka pisa kam dei kaba beaiñ, hynrei ka wanrah jingeh bha ïa ki paidbah kiba bat ïa ka pisa T10 tyngka nar namar ba ki nong die dukan kim treh ban shim ïa ka pisa, ha kajuh ka por, u la ong ba kane ka wanrah ïa ka jingsngew lyngngoh ïa kiba bun khamtam kito ki briew kiba wan na bar ka district bad na bar ka jylla bad ka long ruh kaba sngew jah burom ha khmat kito kiba wan na bar ka district bad na bar ka jylla.
U bah Arkijan, u kyntu ïa u Deputy Commissioner ka East Jaiñtia Hills District ba u dei ban leh eiei halor kane ka jingleh jong ki nong die dukan bad ki paidbah hapoh ka district ba ki dei ban tip bad ban sngewthuh ba ka T10 tyngka nar (coin) ka dei ka pisa kaba lah ban pynïaid ïew bad ba ki dei ban pdiang lada ki nong wan thied jingthied ki ai, u la kyntu ruh ïa ki bor district ba ki dei ban pynmih da ka hukum (order) bad ban pynshai sha ki paidbah bad ruh ban pynshitom ïa kito ki bym treh ban shim ïa ka T 10 tyngka nar (coin).
Utei u samla, u kyrmen ba da ka jingshim khia ka ophis u Deputy Commissioner yn sa lah ban pynïaid ïew ïa ka pisa T10 tyngka nar hapoh ka district.
Kum ban shu bynrap, haba pyrshang ban kylli na kiba die dukan halor kaei ka daw ba kim treh ban shim ïa ka pisa T 10 tyngka (nar), ki jubab ba kim tip ïa kaei ka daw, hynrei kim treh pat ban shim, kane ka jia ha baroh ki dukan ha East Jaiñtia Hills District kynthup ki dukan ki trai jylla bad ki dukan jong ki bar jylla.
