Thaw ka SNSBH da ka Core Committee ban ïatai halor ka Roster bad Reservation Policy

0

Shillong, Jymmang 22: Ka Synjuk ki Nongsynshar Shnong ka Bri U Hynniewtrep (SNSBH) ha ka sngi Nyngkong ka la rai ban thaw da ka core committee ban khlieh da u Bah RL Blah kum u Chairman. na bynta ban ïatai sani halor ka Reservation Policy ha shuwa ba ka sorkar jylla kan khot ban ai jingpynhsai pynsngewthuh ïa ki shaphang ka Roster System.
Haba kren sha ki lad pathai khubor hadien ba la kut ka jingïalang ki khlieh nongsynshar, u Secretary ka Synjuk u Bah RL Blah u la ïathuh ba ka rai ban thaw ïa ka committee ka dei namar na ka lïang ka sorkar lyngba u Myntri Rangbah u la pyntip ba ka sorkar ka don ka jingthmu ban khot ïa kane ka jingilang ban ai jingpynhsai jingpynsngewthuh ïa ki shapang ka Roster System.
“Ngim pat ïoh satia ka jingkhot sngewbha hynrei u Myntri Rangbah u la ai ïa ka khubor ïa ngi ki nongsynshar shnong ba ka sorkar ka thmu ban khot ïa ka jingïalang ha ka 26 tarik bad lada kumno kumno kam khot ruh na ka liang ka core committee kaba ngi la thaw kan sa ïatai sani ba lada khot ngin leit ban ai ïa ki jingmut bad lada kam khot ruh ngi leit ban ïakynduh bad ka sorkar ban ai jingmut halor kane,” u la ong.
Haba kren ha kaba ïadei bad ka Reservation Policy, u Bah RL Blah u la ong ba ka Synjuk ka sngewthuh shai ba kane ka polisi bhah kam ka sorkar jylla bad uh ka polisi bhah kam ka sorkar India kan ym neh shijunom hynrei kan poi ka por yn sa pyndam noh.
“Ngi buh ka jingkyntu sha ka jaidbynriew ba ngim dei ban hun ban ïakhun tang para ma ngi hynrei ban trei shitom ban kotbor ruh ban ïakhun bad kiwei pat ha ka thup General bad ngi sngew sarong kum ka jaidbynriew ba ki la bun ki samla kiba ha ka jingpule ki la lah ban kham tam sha khmat ban ïa kiwei pat,” u la ong.
“Ngi kwah ba ki samla kin trei shitom ban ïakhun bad kiwei ki jaidbynriew bad katba ngi dang don kane ka bhah kam ngin pyndonkam hok bad ym dei pat ba ngin hun tang ban ïakhun para ma ngi hynrei bad kiwei ruh ban kham tam shuh shuh ïa ki,” u la ong.Thaw ka SNSBH da ka Core Committee ban ïatai halor ka Roster bad Reservation Policy

Leave A Reply

Your email address will not be published.