Balei yn leit sha Supreme Court hab ala don ka High Court, ther ka HITO ïa ka ACHIK
Shillong, Jymmang 22: Ka Seng HITO ka la ther tyngeh ïa ka Seng ACHIK na Garo Hills halor ka jingpynmih khubor jong ka pyrshah ïa u Bah Ardent Basaïawmoit, President ka VPP, kaba la ong ba kito kiba sngewwit ïa ka Reservation Policy kaba la treikam naduh ka snem 1972, ki lah ban leit ujor sha Supreme Court.
Ha ka kyrwoh ba la pyllait da u President ka Seng, u Bah Donbok Dkhar, ka HITO ka ong balei yn hap ban leit shaduh ka ïingbishar ba hakhlieh duh jong ka ri India, haba ka jylla ka don la ka jong ka ïingbishar bad kata kadei ka High Court of Meghalaya. Ka Seng ka la kynthah ruh ïa ka General Secretary jong ka Seng Achik Conscious Holistically Integrated Krima (ACHIK) kaba dei ka nongsaid aiñ bad kaba tip ruh ba ka jylla ka don la ka jong ka ïingbishar. “Ka long kaei kaei kaba sngewkhia shibun ba ka General Secretary jong ka ACHIK, kaba dei ruh ka nongsaid aiñ kan bthah pynban ban leit sha ïingbishar ka ri India”, la ong u Bah Donbok.
U la ong ruh ba ka High Court jong ka Meghalaya, kadei ka rynsan kaba biang eh ban ujor lada don kino kino ki jingbymhun bad toi lada ym hun ïa ka rai jong ka High Court lah ban leit pat sha ka Supreme Court.
Ha kajuh ka por ka Seng ka ong ba ka jingbym bhah ïa ka polisi bhah kam katkum ka jingbun briew ka la ktah shibun ïa ki Samla na Rilum Khasi Jaiñtia. Haba kdew ïa ka jingbun paid katkum ka khanasamari u snem 2011 ka jingdon briew ki Khasi Jaiñtia ka long 14,11,775 ngut, katba ki jaidbynriew Garo pat ki don 8,21,026 ngut. “Ka jingmang ne ka jingbhah mar 40% kam ïahap shuh katkum ka jingbun briew”, la ong u Bah Donbok. U la ong ba dei namar kane ka daw ba ki Samla Khasi ki hap ban mad ïa kiba bun ki jingeh namar ba la tuh noh ïa ka hok jong ki.
Shuh shuh ka Seng ka ong ba ka jingpyntreikam ïa ka Roster System lyngba ka Office Memorandum, kadei kaba la shu leh khlem da pyrkhat bha ne kaba la shu leh khlem da shim ïa ka jingbun briew hapdeng kine ki artylli ki kynhun jaidbynriew ha ka jylla.
Kumta na ka liang ka Seng ka ong ba ka por ka la dei ba ïa ka Reservation Policy la dei ba pynthymmai noh.