Shillong, Jymmang 22: Ka tnad forest jong ka sorkar jylla ha ka step jong ka lah sngi u Blei ka 22 tarik Jymmang 2023 ka la leit ban jynrat naphang ïa 50 tylli eiei ki dukan da ki puh shilum ïa ki dukan kiba la pynïeng ha shi lynter jong ka surok 7 mer, ha kaba ka la wanrah ka jingjulor kaba khraw bad ka jingduhnong ïa ki trai ba buh dukan.
Kane ka jingleit ban jynrat noh ïa kitei ki dukan kiba dei jong ki Khasi kadei hadien ba la kut ka jingai por ba kin kynriah nakatei ka jaka kaba ki shna be-aiñ ha ka jaka ba dei jong ka tnad Forest.
Katkum ka jingïathuh da ki nong shong dukan, ba ka tnad forest ka la shu leh donbor ban wan pynpra ha ka por mynstep khlem da ai por lane ban ap ïa ki tad haduh ba kin da wan poi ha katei ka jaka ban lum ban lang ïa ki tiar lane ban pynpra hi ïa ki dukan.
“Wow ïa ngi te ki sted ban wan kyndang hana ba ngi shna be-aiñ ïa ki khar metor hato ka sorkar ka la leh aiu ba ki sah be-aiñ ha katei ka jaka ha Iewmawlong, jin lada ka leit kyndang ïa ki ngin ai jingsnoh kti lang bad ka hynrei ka la leh kumta, EM. Ïa ngi ym don ba ai por ban lum ïa ki tiar ki tar bad ym don hi ruh ba ai jingtip hynrei la shu wan pynpra beit da ka bor,” ong kawei ka longkmie ba buh dukan ha katei ka jaka.
Ha ka jingïakren bad ki nongbuh dukan ha katei ka thaiñ ki la ïathuh ruh ba ha ka por ba ki dang shna ym don kiba wan tuklar hynrei mynta haba ki la im jakpoh na kaba shong dukan ha katei ka jaka la kumba san bnai eiei, ka tnad forest ka la wan tuklar ban pynpra bad ban pynduh syndon ïa ka kamai kajih jong ki.
Na ka liang ki nongshong dukan ki la ïathuh ba ki la ïoh jingbit na u Bah Rapsang ban shna dukan da kaba kam ruh ba udei u trai jong katei ka jaka bad siew ruh ïa u man la u bnai. Kawei ka longkmie kaba shong dukan ka la ïathuh ruh ba ha katei ka jaka ki don kumba 50 tylli eiei ki dukan hynrei ka tnad forest ka la ai shithi tang sha ki 8 ngut katba ïa kiwei ka khlem ai kino kino ki shithi ne jingpyntip.
Shuh shuh na ka liang ki nongshong dukan ki la dawa ba ka tnad forest kan hap ban siew ïa ka bai lutksan jong ka jingpynpra be-aiñ ïa ki dukan jong ki kaba la wanrah ka jingduhnong kaba khraw.
