Shillong, Jymmang 22 : La bun ki briew kiba ud bad ïoh thied ïa ki dohkha Andra Pradesh kiba ki nongkhaïi ki la pyndonkam ban theh da ka dawai Formalin ( ka dawai ba ju injek ïa ki briew kiba khlad na ka pyrthei ban ym sma) khnang ba kine ki dohkha kin ym sma bad pyut.
Kat kum ka jingujor ba la ïoh pdiang na u Mawphor na ki katto katne ngut ki nongbam dohkha ki la ïathuh dang ha ka Sngi Saitjaiñ ki la thied dohkha na ïewduh kaba dei ki kha Andra Pradesh bad haba la poi ha ïing ki la sei ban sait bad sdieh hynrei mar ïa sei ki la ïoh sngew lypa ïa ka jingsma dawai bad haba sdieh lei lei ym nud shuh ban bam namar ka jingiw kata ka jingsma dawai ka dang jur dang jur.
Halor kane ka jingtheh dawai ïa ki dohkha ka jingkylli kaba mih na ki paidbah ka long hato ki bor sorkar kiba dei peit ïaki mar bam mar dih kim lah mo ban leit talasi bad eksamin ïaki dohkha khnang ba kin lap ïa kane namar lada kane ka ïai bteng kan ktah ïa ka koit ka khiah jong ki briew khamtam kiba duk ba rangli. Namar ïa kiba pli ka shi kilo ne shiteng kilo ka dohkha ka dei ka jingpynlut kaba la heh na la ka umsyep ba ki kamai jakpoh kumta wat la ki sngewthuh ïa ka jingsma dawai ruh kin bam beit ïa ka dohkha.
Iwei na ki nongujor i la ïathuh ha ka Sngi Saitjaiñ i la leit thied ïa ka khabah na ïewduh kaba heh bha kaba kit arkilo tam bad ynda la poi ha ïing i la sei ban sait hynrei haba i la sngewthuh ba la dep theh dawai Formalin im banse i hap ban bret ïa baroh ka dohkha ba la thied.
Kumta halor kane ka jingkyntu jong ki paidbah ïa ki bor ba dei peit ka long ba kin leit eksamin ïaki dohkha ba wan na Andra Pradesh khnang ba kin lap bad ban khang ban die ha ki ïew ki hat ban lait na ka jingshah ktah ki paidbah ha ka liang ka koit ka khiah.
