Ha Delhi ïakren ka NPP ban pynkhreh ïa ka elekshon MP bad elekshon MLA ha Mizoram bad AP

New Delhi, Jymmang 22 : Ka National People’s Party (NPP) ha ka sngi Nyngkong ka la rai ban pynkhreh noh shaid shaid ïa ka elekshon MP ha ka Ri bad ruh na bynta ka elekshon MLA kaban long ha Mizoram.
ïa kane ka rai ka NPP ka la shim ha ka National Execuyive Committe Meeting jong ka NPP kaba long ha Constitution Club of India ha nongbah New Delhi.
Ha kane ka jingïalang la pynïaid hi da u National President ka NPP ba dei ruh u Myntri Rangbah ka Meghalaya, u Conrad K Sangma. Ki dkhot ka NCM kiba wan ban shim bynta ki kynthup naduh na Assam, Arunachal Pradesh, Manipur, Mizoram, Chhattisgarh, Jharkhand, Karnataka, Gujarat bad Uttar Pradesh.
Ha katei ka jingïalang, kiwei ki jylla ki la ai ïa ka kaiphod haba ïadei bad ka jingpynkhreh ïa ka elekshon sha Lok Sabha ka ban sa long shen kumjuh ruh na bynta ka elekshon MLA ka ban sa long ha Mizoram.
Na ka liang u National President haba kren ha kane ka sngi u la ong ruh ba ka party ka pynkhreh ruh ban sei kyrtong hi ha kylleng ki jylla la ka long ha ka elekshon MLA ne wat ha ka elekshon MP khamtam eh ha kito ki jylla ba don ki riewlum ne ritpaid.
Ha kane kajuh ka sngi, la pynkup burom ruh ïa ki MLA ba dang jop thymmai na Meghalaya, Manipur bad ruh na Nagaland.
La ïoh ruh ïa ka kaiphod na u National Treasurer ka party, James K Sangma na bynta ka samoi treikam jong u 2023 – 24 kaba long katkum ka kyndon jong ka Article 23 (V) jong ka riti treikam ka party. Ha kajuh ka por ki state president naman la ki jylla ki la wanrah ïa ki kaiphod treikam jong ka party.
Katba na ka liang ki state president na ki jylla bapher bapher ki la wanrah ïa ki kaiphod treikam.
Ka party ka la shim ruh ïa ka rai haba ïadei bad ka jinglong jingman ha Manipur. Ha katei ka rai la ong, “Ka National People’s Party (NPP) ka dap da ka jingsngewsih kaba Khraw halor ka jinglong jingman ha ka jylla Manipur. Kum ka party ngi la rai ban ai ka jingtreilang na ka bynta ban wanrah biang ka suk ka saiñ bad ka shongsuk shongshngaiñ ha katei ka jylla. Ngi duwai ruh na bynta ka jinglong jingman hangtei ba kan wanphai biang sha ka suk ka saiñ.”
Ha kane kajuh ka sngi, u Conrad u la pynbna ruh ba la kyntiew ïa u National Treasurer ka party James K Sangma kum u National General Secretary (Organisation) bad u nongpeit ïa ka Jylla Arunachal Pradesh.
Hynrei na bynta ka elekshon MLA kaban sa long ha Mizoram, la thung ïa ka Dr. M Ampareen Lyngdoh ba dei ruh ka Myntri Sorkar ka jylla kum ka nongpeit ïa katei ka jylla.
La jied ruh ïa u MLA na Manipur, u M Rameshwar Singh bad MLA na Meghalaya Ian Botham K Sangma ryngkat uwei pat u nongïalam ka party u Sushil Huidrom kum ki nongpeit lang (co – incharge) ïa ka jylla Arunachal Pradesh bad Mizoram ban peit ïa ka jingtreikam ka party ha kitei ki jylla ban pynkhreh elekshon MLA bad ruh ïa ka elekshon MP.
Ka jingïalang ka la jied ruh ïa u MLA ka Nagaland u N Nyamyei Konyak kum u State President katba u President ba mynta u Dr. Andrew Ahoto un shimti noh kum uwei na ki National General Secretary ka party.