Ka UDP bad ka HSPDP ruh ki ong ban review noh ïa ka Reservation Policy
Balei pat kim nud kren eiei, ong ki Samla NEHU
Shillong, Jymmang 22: Ki mat ïaleh elekshon ne manifesto jong ka UDP bad ka HSPDP ha kane ka elekshon ba dang shu dep, ki pynpaw ba baroh ar tylli kine ki Party ki kwah ban pynkylla ne ban review noh ïa ka Reservation Policy.
Lyngba ka manifesto, kaba mut ba kine ki seng saiñpyrthei ki la tyrwa sha u paidbah ruh halor kane kawei ka mat nalor kiwei kiwei pat ki mat ba ki la buh ha ka manifesto.
Ka kopi jong ka manifesto ka UDP bad ka HSPDP kaba la ïoh kopi da u Mawphor ka pyni shai ba kane ka mat ka don ha ki mat ïaleh elekshon jong ki. Ka UDP ka la jop 11 ngut ki MLA bad kiew 12 ngut hadien ka elekshon Sohïong. Ka UDP ka don arngut ki Minister ha ka sorkar MDA:2, katba ka HSPDP ka don uwei. Kiwei pat ki MLA jong kine ki Seng ki bat kam Chairman ha kane ka sorkar ba ïalam da ka NPP.
Ka jingkylli kaba bun ki kylli ka long, balei ba kine ki artylli ki Seng Riewlum pat ki sngap man man haba la mih ka jingdawa ym tang na ka Seng VPP hynrei na u paidbah bun jong ka Ri Khasi Jaiñtia bad khamtam eh ki samla wadkam wadjam.
Katto katne ngut ki samla pule na NEHU kiba la wanrah ïa kine ki manifesto ha u nongthoh khubor, ki la ong, “Balei ka UDP bad ka HSPDP kim nud kren ïa kane ka mat haba ki la buh ha ka Manifesto jong ki. Hato kila shu pynbieit ïa ki paidbah?”, ki la ong.
Shuh shuh kine ki Samla kiba la ïathuh ba ryngkat bad ka jingleit pule ha Univeristy kila thepkam bad wadkam artad artad, hynrei kim shym la ïoh satia, namar naduh ba la pyntreikam ïa ka Roster System, kim shym la shah khot satia pat sha ka interview, namar ba ym don jaka shuh kiba lait.
Kine ki samla ki la pynpaw ruh ba borabor, ki Party haba ki buh ïa ka manifesto kidei bankren ne pyntreikam haba ki don ha ka bor synshar, kumba la leh da ka BJP ha Kashmir, haba ka la pynduh noh ïa ka Article 370, namar ba kane ka mat ka don ha ka manifesto jong ka. “Ngi kwah ba kylli ruh ïa ki MLA ka UDP bad HSPDO la ki la kren ei ei ne em ha ka Cabinet ne ha ka jingïalang jong ka MDA ne ka jingïalang jong baroh ki Party halor ka Reservation Policy haba ki la buh ha ka manifesto jong ki”, la ong kine ki Samla.