Ka National Law University ka dei ka rynsan kaba biang eh ban ïatyrko ong u heh ka NPP ïa u heh ka VPP

Shillong, Jymmang 22 : U President ka National People’s Party (NPP) bad u MP ka Rajya Sabha na ka jylla u Dr W.R Kharlykhi u la ong mynta ka Sngi Lah U Blei ba ki paidbah ki la tip lypa kiei ki jingthmu jongka Voice of the People Party (VPP) ha lyndet kane ka Reservation Policy.
Halor ka jingkob jongka VPP ban ïa tyrko nia (debate) halor kane ka mat u Dr Kharlukhi u la ong “ Ka dei ka jingai jingmut ba bha tam bad nga ngeit ka National Law University ka dei ka rynsan kaba biang tam ban ïa tyrko nia bad ban sakhi lang da ki riewstad aiñ, riew donburom, riewshemphang, ki heh khlieh jongka jylla bad ki nongthoh khubor”.
Shuh shuh u la ong “ Wat la ïa ka VPP kane ka dei ka issue saiñ pyrthei jongka, hynrei ngi sngewkhia ba ïa kane ka mat lada pynkylla kum ka issue saiñ pyrthei ïoh ka ktah pat hakhmat ka aiñ. Ngan jin da la sngewkmen ha ka jaka ban ïaid kyllaiñ ne kren kyllaiñ bad pynthoh bria ïa ka NPP ba ka alam bakla halor kane ka kam, kaba nga sngew ba ka long kaba bakla ïa ki (VPP) ban leh, hynrei ki paidbah ki sngewthuh don aiu ha lyndet jong kane” ong u Dr Kharlukhi.
Kane ka jingkren jongu ka long shisngi hadien ba ki nongïalam ka VPP ki la ther ïa ki nongïalam ka NPP da kaba kynnoh ba ki ïalam bakla ba kata ka jingpynkylla ïa ka reservation policy ka lah ban wanrah ka jingsngew ïapher jaidbynriew.
U Dr Kharlukhi ula pynkynmaw ïa ki nongïalam ka VPP ban phai sha ki khubor ba mih ha ka 1 tarik Iaiong bad ha ka 28 tarik u Iaiong mynta u snem khnang ba kin sngewthuh kaei ka jingsngew jong ki paidbah ïa ki bad kaei kaba ki la leh ïa ka jylla.
“ Phi ïai kren halor ka Reservation Policy kaba kat kum ka Resolution ha ka 12 tarik Kyllalyngkot 1972 da kaba kdew ïa ka office memorandum jongka sorkar nga kwah ban ong wat klet ïa ka paragraph kaba nyngkong kaba batai ïa ka Clause ba 4 jongka Article ba 16 jongka Riti Synshar ka ri India” ong u Dr Kharlukhi. U la ban biang da kaba ong “ Nga ngeit skhem ba lada bakla ban shim rai ïa kata ka rai lah ban ujor sha ka ïing bishar. Ka jingkylli ka long hato kata ka Office Memorandum kan ïeng nongrim hakhmat ka Clause ba 4 jongka Article ba 16 ka Constitution jongka ri”.
Sa kawei pat ka jingeh kaba lah ban mih ka long ba ka rai jongka ïing bishar Supreme Court kata da ki Nongbishar ba 9 ngut ha u snem 1992 ka long ba ka Reservation Policy kam lah ban palat ïa ka 50 %. “ Ka jingkyntiew ba 10 % mynta ruh ka dei ka rai jongka ïing bishar Supreme Court ha u snem 2019 na ka bynta kito ki kynhun rit paid kiba dang tlot bad duna palat pud” ong u Dr Kharlukhi.